Қазақстанда Ата Заңға жекелеген өзгерістер енгізу емес, мүлде жаңа Конституция қабылдау мәселесі күн тәртібіне шықты, – деп хабарлайды 7-su.kz ақпараттық порталы.
Неліктен жаңа Конституция қажет?
Мемлекет басшысы Қасым-Жомарт Тоқаев Конституциялық комиссияның жұмысын қорытындылай келе, еліміздің саяси жүйесіне түбегейлі өзгерістер қажет екенін атап өтті. Комиссияның он отырысы барысында ұсынылған түзетулердің ауқымдылығы соншалық, мамандар қолданыстағы заңды жаңартумен шектелмей, жаңа құжат әзірлеу туралы ортақ шешімге келген. Биылғы қаңтар айында жарияланған жаңа Конституцияның алғашқы нұсқасы қоғам арасында үлкен қызығушылық тудырды.
Саяси мәдениеттің өсуі және ашық диалог
Президенттің айтуынша, азаматтардың заң жобасындағы әрбір бапты қызу талқылауы – елдегі саяси мәдениеттің жаңа деңгейге көтерілгенінің белгісі. Бұл үдеріс мемлекеттің «Әртүрлі көзқарас – біртұтас ұлт» қағидатын ұстанатынын айқындай түседі.
«Біз плюрализмге – ашықпыз, экстремизмнен – қашықпыз. Осы ұстаным арқылы қоғамдық диалогты дамытып, еліміздің алға басуына жол ашамыз», – деді Қасым-Жомарт Тоқаев.
Құжаттың басты ерекшелігі
Жаңа Конституция жобасы – мемлекеттің сапалық тұрғыдан өзгеруіне негіз болатын құжат. Ол тек құқықтық нормалар жиынтығы емес, еліміздің даму бағытын айқындайтын даңғыл жол іспетті. Жұртшылық назарына ұсынылған бұл құжат билік пен қоғам арасындағы сенімді нығайтуды және мемлекеттік басқару ісін барынша ашық етуді көздейді.
Мемлекет басшысының бұл саяси бағдары азаматтардың белсенділігін арттырып, Әділетті Қазақстанның негізін қалауға бағытталған. Қазіргі уақытта Конституция жобасына қатысты ұсыныстарды қабылдау мен сараптау жұмыстары жалғасуда.
