Аз қамтылған және көпбалалы отбасыларға арналған «Жанұя» әлеуметтік орталығының жұмыс жасағанына бір жылға жуық уақыт болды. Әлеуметтің әлеуетін арттыруға қолдау көрсететін ұйым Талдықорған қаласында орналасқан.
Орталықтың жұмысы «бір терезе» қағидаты бойынша жүзеге асырылады. «Жанұя» мамандары әлеуметтік жағдайы төмен отбасыларды әлеуметтік бағдарламалар туралы ақпараттандырады, қажетті құжаттарды дайындауға көмек көрсетеді. Сондай-ақ, орталық заңгерлік және психологиялық кеңес, оңалту көмегін және басқа да қызмет түрлерін ұсынады.
«Жанұя» аз қамтылған және көпбалалы отбасыларға арналған әлеуметтік орталық Талдықорған қаласының жұмыспен қамту, әлеуметтік бағдарламалар және азаматтық хал актілерін тіркеу бөлімінің бастамасымен құрылды. Орталықты құрудың мақсаты Талдықорған қаласында тұратын әлеуметтік осал отбасылардың өмір сүру сапасын арттыру, экономикалық дербестікті нығайту және азаматтардың өмірлік қиын жағдайдан шығуы үшін жеке уәждемесін нығайту болып табылады», – дейді облыстық әйелдерді қолдау орталығының президенті Жанар Нұрмұханова.
Бүгінгі таңда «Жанұя» орталығы көпбалалы отбасыларды жеке-бағдарлы сүйемелдеуді қамтамасыз етеді. Бұған психологиялық білім беру, құқықтық, әлеуметтік-медициналық, еңбек-мәдени сипаттағы іс-шаралар кіреді.
«Жанұя» аз қамтылған және көпбалалы отбасыларға арналған әлеуметтік орталықтың өкілі Мадина Белгібаеваның айтуынша, көпбалалы аналар мұнда тігін ісі, бет әрлеу, компьютерлік сауаттылық және аспаздық бойынша оқыту курстарынан өтеді.
Бүгінге дейін орталыққа 2000-нан астам отбасы көмек сұрап келді. Оның 175-іне психологиялық көмек, 190 отбасына заңгерлік қызмет көрсетілді.
Назерке СЕЙСЕНБАЕВА,
облыстық Азаматтық альянсының
PR-менеджері
