Мемлекет басшысының Жарлығымен Жаслан Мәдиев Қазақстан Республикасы Премьер-Министрінің орынбасары – Жасанды интеллект және цифрлық даму министрі болып тағайындалды, – деп хабарлайды 7-su.kz ақпараттық порталы.
Жаслан Мәдиев 1983 жылы Алматы қаласында дүниеге келген. Әл-Фараби атындағы Қазақ ұлттық университетін, Колумбия университетін және Массачусетс технологиялық институтын тәмамдаған.
Еңбек жолын 2004 жылы «Альянс банк» АҚ Халықаралық қатынастар департаментінде бастаған. 2007–2008 жылдары «Қазына» тұрақты даму қоры» АҚ корпоративтік қаржыландыру департаментінің бас менеджері болды. Кейін Президент Әкімшілігінің Стратегиялық талдау және зерттеулер орталығында, сондай-ақ «Самұрық-Қазына» ұлттық әл-ауқат қоры» АҚ құрылымында қызмет атқарды.
2009–2010 жылдары «KAZYNA CAPITAL MANAGEMENT» АҚ басқарма төрағасының орынбасары, 2010–2014 жылдары «Қазақстанның даму банкі» АҚ басқарушы директоры әрі басқарма төрағасының орынбасары болды.
2014–2015 жылдары Ұлттық банктің құрылымында басшылық лауазымдарда еңбек етті. 2017–2018 жылдары «Қазақстан темір жолы» ұлттық компаниясы» АҚ вице-президентінің міндетін атқарушы, кейін қаржы жөніндегі вице-президенті болды. 2018 жылы компанияның қаржы жөніндегі басқарма төрағасы қызметіне тағайындалды.
2019–2020 жылдары Ұлттық экономика вице-министрі болды. 2020 жылдың қазан айынан бастап Стратегиялық жоспарлау және реформалар агенттігі төрағасының орынбасары қызметін атқарды.
2022 жылы Цифрлық даму, инновациялар және аэроғарыш өнеркәсібі министрлігінің бірінші вице-министрі лауазымына, ал 2024 жылы министр қызметіне тағайындалды.
Бүгінде Жаслан Мәдиев жаңа құрылған Жасанды интеллект және цифрлық даму министрлігін басқаратын болды.
