Қай кезде де жастарға үлкен жауапкершілік пен сенім артылады. Өйткені келешек солардың қолында. «Жасыңды көрсет, болашағыңды бажайлайын» деген шығыстық нақыл соның айғағы. Алысқа бармайық, ұлт ұстазы Ахмет Байтұрсынұлының «Біздің заманымыз – өткен заманның баласы, келер заманның атасы» деген нақылында да үлкен мән бар. Бүгін біз ұрпақты қалай тәрбиелесек, қандай білім берсек болашақтың болмысы сондай болмақ. Осындай тұщымды ойды «Әділетті және Прогрессивті Қазақстанның Халықтық Конституциясы үшін!» Жалпыұлттық коалициясының өкілдері ҚР Парламенті Сенатының депутаттары Амангелді Есбай, Ғалиасқар Сарыбаев және өңірлік коалиция өкілі Гүлнар Тойлыбаевалар Сарқан ауданы жастарымен кездесуде сөз етті.
Жалпыұлттық коалицияның міндеті – жаңа мәтіндегі Конституция турасында түсіндіру болса, спикерлер сол үдеден шықты. Шараға қатысушы түсіндірме топ қатысушыларға Конституциядағы жаңартулардың маңыздылығы қарапайым әрі түсінікті тілмен жеткізді. Құқықтық реформалардың ел дамуына, әділ сот төрелігіне, азаматтардың қорғалуына әсері туралы нақты мысалдар келтірді.
Алғысөзді алған Амангелді Есбай Жаңа Конституция жобасы – еліміздің ертеңін айқындайтын, жастарымыздың сапалы білім алуына кепіл болатын стратегиялық шешім екенін жеткізді.
– Ертең үшін Мағжан Жұмабаев сенген жастардың бүгінін жарқын және жарық етуіміз керек. Қазақ елінің көгінде жарқырау үшін. Бабалар аманаттап қалдырған ұлан-ғайыр далада салтанат құруы үшін. Бүгінде мемлекет байлығы біліммен бағаланады. Білімді ұрпақ елдің бәсекеге қабілеттілігіне тікелей әсер етеді. Ал жаңа Ата Заң білім мен ғылымды қолдауда маңызды рөлге ие. Жалпы, Жаңа Конституциялық жоба Әділеттілік, Заң мен Тәртіп, табиғатқа жауапкершілікпен қарау қағидаттарын бекітеді. Білім, ғылым, мәдениет пен инновацияға басымдық беру – адам капиталына сүйенетін заманауи мемлекеттің бағдарын айқындайды, – деді Амангелді Есбай.
Ғалиасқар Сарыбаев та ұлттың болашағын қалыптастыратын жастарға Жаңа Конституция жобасы ең алдымен білім мен ғылымға арқа сүйейтінін сөз етті. Бұл құжат – еліміздің ертеңін айқындайтын, жастарымыздың сапалы білім алуына кепіл болатын стратегиялық шешім екенін жеткізді.
Кездесу барысында қатысушылар конституциялық бастамаларды іске асыру мәселелері бойынша ұсыныс-пікірлерін айтты. Сонымен қатар, спикерлер ел ертеңі екшеленетін сәтте жастардың бей-жай қалмай, мемлекет тағдырын бірге жасауға шақырды.
“Жетісу-Ақпарат”
