Соңғы жылдары елімізде вайнерлердің бір буыны қалыптасып үлгерді. Әлеуметтік желілерде танымалдылыққа ие болған жандардың «вайн» атаулы шағын роликтері миллиондаған қаралым жинайды. Әзілді жарастырар вайнерлер бүгінгі күні қолындағы ұялы телефонымен-ақ вайндарды кез келген жерде түсіре береді. Шағын роликтер тек қана әзіл аясында топтаспай, ел ішіндегі өзекті мәселелерді де қозғайтыны бар. Мұндай вайндар әлеуметтік желіде көпшіліктің талқысына түсіп, сұраныс жағынан артады.
Солардың бірі – қазақ тілді аудитория сүйіп көретін ХАХА ШОУ. Бүгінде олардың Instagram желісінде 1,5 млн. оқырманы бар. Жас вайнерлердің айтуынша, вайн түсіруіне қазақтілді вайнерлердің аздығы түрткі болған: «Бұған негізі жастардың қызығушылығы басым. Қазіргі таңда қазақтілді вайн-видеоларға қарағанда орыс тіліндегі вайндар танымал. Біздің мақсат – қазақ жастарының назарын қазақ тіліндегі вайндарға аудару», – дейді Ақсұлтан Қалиев. Ал әуелде вайн түсіру қалай басталғанына тоқталған Заңғар: «Көктем кезінде лас аяқкиімімізді қармен сүртіп жатқан сәтті видеоға түсіруден басталды. Ойда-жоқта басталған дүние бүгінге дейін жалғасып келеді», – деп өз сөзін қорытындылады.
Жалпы Қазақстандағы вайн үлкен қалаларда ғана емес, біздің талдықорғандық блогерлердің белсенді болуына да әсер етті. Раша Мұқанов есімді жігіттің вайн түсіруді бастағанына көп болмаса да, әлеуметтік желіде 58,3 мың оқырман жинап үлгерген. Біз Рашадан оның сырын сұрап білген едік.
– Вайн түсіруді қашан бастадыңыз?
– Менің вайнға келуіме танымал вайнер досым Қуандық Сағыныш себеп болды. Ол маған қолдау көрсетіп, бастапқыда әзіл-скеч видеолар түсіріп, үйретті. Осылайша бауырымның арқасында вайнер болып қалыптасып жатқан жайым бар.
– Бұл хобби ме, әлде, арнайы жұмысыңыз ба?
– Мұны арнайы бір жұмыс деуге тілім бармайды, хобби деп те айта алмаймын. Маған вайн түсірген ұнайды.
– Әлеуметтік желідегі вайндарыңызды қандай мақсатта түсіресіз?
– Негізі арнайы көздеген мақсатым жоқ. Өзім көңілді жан болғаннан кейін елге көтеріңкі көңіл-күй сыйлағым келеді. Сонымен қатар әр вайнымды тәрбие беретіндей мағыналы, елдің намысына тимейтіндей әзіл араластыра түсіргенді жөн көремін.
Келесі талдықорғандық вайнеріміз әлеуметтік желіде kris_p_tdk парақшасымен көпке таныс Айдос Кертаев. Әлеуметтік желісінде 105 мың оқырманы бар. Ол өз парақшасында түрлі әлеуметтік-тұрмыстық видеолар түсіріп, Талдықорғанның жаңалықтарымен бөлісіп отырады. Айтуынша, вайндарды ойластыру оған қиынға соқпайды. Тек өмірден кездестірген көріністерін шағын видеоға түсіреді және де вайн-әзіл болғандықтан, адамдарға өз вайндарымнан терең ой салатын мағына бергім келеді, – деп топшылады.
Бұл жігіттердің вайндарының өз ерекшелігі болғанымен кейбір басқа вайнерлердің түсірген көріністерінің еш мағына бермейтініне қарап налитының бар. Қандай вайн болса да адамға ой салып немесе күлкі тудыруы керек деп ойлаймын. Сапалы, мағыналы нәрсе ғана өміршең болады.
Әр нәрсенің жақсы не жаман жағы болатыны секілді, қазіргі вайнның да ұтымды және ұтымсыз тұстары бар. Жақсы түсірілген видеолар вайнерлердің танымалдылығының артуына әкеп соқтырса, ал мағынасыз дүниелер адамның бекерге уақытын алып, кейде ашу да тудыратыны жасырын емес. Ал, жоғарыда мысалға келтірген жақсы вайнерлеріміз болашақта вайнның нарығында көш бастайды деп сенеміз.
Айгерім Есімхан,
№12 орта мектеп-
гимназиясының 10-сынып
оқушысы
Талдықорған қаласы
