Балқаш ауданында «Дипломмен – ауылға» бағдарламасын іске асыру барысында тыңғылықты жұмыс атқарылуда. Аудандық экономика және бюджеттік жоспарлау бөлімі ауылдық елді мекендерге жұмыс істеуге және тұруға келген денсаулық сақтау, білім беру, әлеуметтік қамсыздандыру, мәдениет, спорт және агроөнеркәсіптік кешен саласындағы мамандарға әлеуметтік қолдау шараларын ұсынатын бағдарламаның әкімшісі болып табылады.
Бағдарлама Қазақстан Республикасы Ұлттық экономика министрлігінің 2020 жылғы 27 мамырдағы №43 бұйрығымен бекітілген әлеуметтік қолдау шараларын ұсыну қағидаларының негізінде іске асырылады. Бұл бағдарлама шеңберінде ауылдық елді мекендерге жұмыс істеу және тұру үшін келген мамандарға берілетін көтерме жәрдемақы көлемі 100 айлық көрсеткіш есебінде (ағымдағы жылға 277800 теңге) және тұрғын үй сатып алуға немесе салуға бюджеттік кредит көлемі 1500 айлық көрсеткіш есебінен аспайтын (ағымдағы жылға 4 167 000 теңге) мөлшерінде беріледі.
Биыл 20 маманға 277 800 теңгеден 5 556 000 (бес миллион бес жүз елу алты мың) теңге көтерме жәрдемақы беріліп, 13 маманға 49 312 000 (қырық тоғыз миллион үш жүз он екі мың) теңге көлемінде тұрғын үй несие алуға қаражат төленді. Оның ішінде негізгі қаражат ағымдағы жылға берілген бюджеттік өтінімге сәйкес, денсаулық сақтау саласы бойынша жоғары білімді төрт маманға, яғни, 2 терапевт дәрігері, 1 балалар дәрігері, 1 мейірбикеге, білім саласы бойынша 15 маманға, оның ішінде 6 ағылшын тілі, 1 математика, 1 орыс тілі, 1 қазақ тілі мен әдебиеті, 1 саз мектебінде қобыз сыныбының, 2 тарих, 1 дифектолог маманы, 2 арнайы оқыту мұғаліміне, ветеринария саласы бойынша бір ветеринариялық фельдшер маманға берілді. Жалпы, аудан бойынша дипломмен ауылға бағдарламасымен 2009-2010 жылдан бастап 373 маманға 73,9 млн.теңге көтерме жәрдемақы берілсе, 229 маманға бюджеттік несие бойынша 543,4 млн.теңгеге үй сатып алынды.
Көтерме жәрдемақы алудың да өз тәртібі бар. Ол үшін жас маман Қазақстан Республикасы Ұлттық экономика министрлігінің ағымдағы жылдың 27 мамырындағы №43 бұйрығы бойынша Халыққа қызмет көрсету орталығы арқылы құжаттар тапсырады. Ол құжаттардың ішінде халыққа қызмет көрсету орталығына өтініш, жеке басын куәландыратын құжат (сәйкестендіру үшін), дипломның көшірмесі, кадр қызметі растаған еңбек кітапшасының көшірмесі болуы керек. Ал бюджеттік несие алу үшін жоғарыдағы құжаттармен қатар жолдасында, өзінде, балаларында үйі бар-жоқтығы туралы анықтама, неке туралы куәліктің көшірмесі, кредит бюросынан есеп секілді құжаттарды қоса тапсыру тиіс.
Айта кетерлігі, бұл маңызды іс жергілікті құзырлы органдардың бақылауында болады. Әсіресе, ауданның (облыстық маңызы бар қаланың) жергілікті өкілі органы (мәслихат) жыл сайын мамандарға көтерме жәрдемақы және тұрғын үй сатып алуға немесе салуға бюджеттік кредит түрінде әлеуметтік қолдау шараларын ұсыну туралы шешім қабылдап, бақылап отыратынын да айта кеткен жөн.
Алпысбай Өмірбаев,
Балқаш аудандық экономика және бюджеттік жоспарлау бөлімінің басшысы
