Жер жаннаты Жетісудың рухани азығына, тыныс-тіршілігінің айнасына айналған ғасырлық ғұмыры бар «Жетісу» газетінің мерейтойлық іс-шараларының бірі – оқырмандармен кездесу болатын. Мәні мен мазмұны бөлек бұл басқосуды талғарлық оқырмандарымыз да асыға күтті. Руханияттың қара шаңырағына айналған Талғар аудандық кітапханасында ұйымдастырылған кездесуге «Жетісу» газетін жата-жастана оқитын көнекөз қариялар бастаған қалың оқырман жиналды.
Ғасырлық мерейтойды арқау еткен жиынға «Өлке тынысы» жауапкершілігі шектеулі серіктестігінің директоры Мейрам Жанәділов, редакция меңгерушісі Қуаныш Тұнғатар, аудан әкімі Рыскелді Сатбаев, аудандық мәслихат хатшысы Жұмахан Еңкебаев, жергілікті ақындар мен журналистер, мемлекеттік мекеме қызметкерлері, қоғамдық ұйым мүшелері және жастар қатысты. Келелі кездесуді аудан әкімі Рыскелді Ахметқалиұлы тізгіндеді.
– Шежірелі 100 жыл ішінде газеттің атқарған жүгі ауқымды. Өңірдегі әрбір игі істі халыққа жеткізуге, жаңалыққа жақындастыруға, еңбекке ұйымдастыруға белсене араласуда. Елбасының сарабдал саясатын, әр жылғы халыққа Жолдауын да жан-жақты түсіндіріп, қарапайым жұртшылыққа жеткізуде журналистер қауымының еңбегі зор. Газеттің сапалы да сауатты шығып, оқырман жүрегінен жол табуы, әрине, ондағы қаламгерлердің іс-тәжірибесі мен шеберлігіне, білімділігіне тікелей байланысты. «Журналист – қоғамның қоңырауы», – деп тегін айтпаған. Сондықтан бүгінгі кездесу газеттің ғана емес, аудан жұртшылығының да қуанышы десем артық болмас, – деген аудан басшысы оқырмандарды және «Жетісу», «Огни Алатау» газеттерінің ұжымын 100 жылдық мерейтойымен құттықтады.
Сонымен қатар, Р. Сатбаев өзі тағайындалған аз уақыт ішінде ауданда атқарылып жатқан істер жайын, әлеуметтік-экономикалық маңызға ие бағыт-бағдарлар жөнінде де құлағдар етті. Екі жүз мыңнан астам халқы бар ауданның ырысын арттырып, тұрмыс-тіршілігін түрлендіруде атқарылып жатқан нақты істер мен алғашқы қадамдар сөз болды.
– Алматыдай ірі мегаполиспен іргелес жатқан ауданның экономикасының нығайып, әлеуетінің жақсара түсеріне сенімдіміз. Осы жолда атқарылып жатқан жұмыстар жайы қос газеттің бетінен жиі орын алып келеді. 100 жылдық тарихы бар газеттеріміз қандай қиыншылық кезеңде де жұмысын тоқтатпағаны белгілі. Дей тұрғанмен, заман талабына орай соңғы жылдары біраз өзгерістер орын алды. Бүгінде облыс әкімінің қолдауымен екі газеттің бір серіктестікке біріктірілуі соның көрінісі, – деген «Өлке тынысы» ЖШС директоры Мейрам Базарұлы бұдан әрі 100 жылдық мерейтой аясында жүзеге асып жатқан мәдени іс-шаралар жөнінде хабардар етті.
Еліміздегі беделді басылымдардың біріне айналған «Жетісу» газетінің 100 жылдығы бір газеттің ғана емес, қазақ халқының бүтін бір тарихы екендігін тілге тиек еткен редакция меңгерушісі Қуаныш Тұнғатар 1918 жылдың 21 маусымында тұңғыш жарыққа шыққан «Жетісу ісші халық мұқбірінің», яғни, бүгінгі «Жетісу» газетінің таралу тарихын, мазмұнын және онда қолтаңбасы қалған Алаш арыстарының мақалалары жайлы егжей-тегжейлі баяндауы оқырманды ұйытты.
– Ғасырмен құрдас «Жетісудың» облысқа ғана емес, республикаға, одан асып алыс-жақын шетелге таралып жатқанына қуаныштымыз. Жарыққа шыққалы бері халықпен бірге жасасып келеді. Өзім 1962 жылдан бері осы газеттің штаттан тыс тілшісімін. Содан бері 55 жыл өтіпті. Менің журналистік қаламымды ұштап, шығармашылығымды шыңдаған да осы басылым. Сондықтан, мен өзімді «Жетісудың» шекпенінен шықтым деп айта аламын. 47 жыл газетте еңбек еттім. Корректорлықтан бастап редакторлыққа дейін барлық сатысынан өттік, – деген ақын, драматург Мұса Жанәділов шежірелі «Жетісудың» ұлылардың көзіне, даналардың сөзіне айналғанын айрықша атап өтті. Ақын ағамыз газеттің алдағы жаңа ғасырында да өміршең әрі оқырманының көп болуына тілектестігін білдірді. Мұндай ақжарма тілекті Тұздыбастау ауылдық әйелдер кеңесінің төрайымы Раушан Қабылжанова да ақтарды.
Ерекше әсерге бөлеген кездесу соңында 100 жылдық тарихы бар «Жетісу» газетінің ең белсенді штаттан тыс тілшілері мен тұрақты оқырмандары М. Жанәділов, Б. Көлбаев, М. Сихымбаева, Н. Қожахметов және Т. Нұрмұхамбетоваларға «Өлке тынысы» ЖШС-нің Алғыс хаты мен тұрмыстық техникалар тарту етілді.
Ұлбосын ИСАБЕК.
