Биыл Перу мемлекетінің Лима қаласында жас- өспірімдер арасында ауыр атлетикадан Әлем чемпионаты өтті.
Әлемдік деңгейдегі дүбірлі додада 300-ге жуық спортшы бап пен бағын сынап, үздік атануға ұмтылды. Сайыста жерлесіміз Ақжол Құрманбек 67 келі салмақта тұғыр биігінен көрініп, елге жүлдемен оралды. Бұған дейін жеті рет ел чемпионатын ұтып, кейбір салмақ бойынша рекорд орнатқан жас өреннің болашағынан үлкен үміт күттіретінін талай мәрте сүйіншілеп жазған болатынбыз.
Жарыстың үшінші күнінде жерлесіміз серпе көтеруден 129 келі, жұлқа көтеруден 156 келіні бағындырып, қос сайыс қорытындысында күміс жүлдені еншіледі. Жұлқа көтеруде алтыннан алқа таққанымен қорытындысы 285 келі болып, қоссайыста 286 келіні көтерген египеттік қарсыласы Ақжолдың алдын орап кетті.
Ақжол спорттың ең үлкен дүниежүзілік додасы – Олимпиадаға апаратын ақ жолына қадам басқандай. Жас чемпионды туған-туысқандары, аудандық балалар мен жасөспірімдер спорт мектебінің ұжымы, қалың көпшілік салтанатпен қарсы алып, ақ тілегін жаудырды.
Жақсылық ЖОМАРТҰЛЫ
Сарқан ауданы
