Жаңа жыл қарсаңында Жетісу облысында қауіпсіздікті қамтамасыз ету мақсатында «Пиротехника» жедел-профилактикалық іс-шарасы жүргізілуде.
Желтоқсан айының басынан бері өткен 120 рейд барысында заңсыз саудаланған 150 пиротехникалық бұйым тәркіленді. ҚР ӘҚБтК-нің 196-бабы бойынша 17 әкімшілік хаттама толтырылып, айыппұлдың жалпы сомасы 1 млн. 228 мың 750 теңгені құрады. Іс-шаралар 2026 жылдың 3 қаңтарына дейін жалғасады.
Салыстырмалы деректерге сәйкес, 2024 жылы өңірде 300-ден астам пиротехникалық бұйым тәркіленіп, 4 млн. теңгеден астам айыппұл салынған.
Жаңа жылдық мерекелерге орай облыс бойынша 487 нысан комиссиялық тексеруден өтті. Оның ішінде 423 білім беру ұйымы, 23 мәдениет үйі және 13 шырша алаңы бар. Талдықорған қаласындағы «Жастар» спорт сарайында өтетін Президенттік және Әкім шыршасына ерекше бақылау қойылды. Мереке күндері өрт қауіпсіздігін қамтамасыз етуге 64 қызметкер мен 42 техника жұмылдырылады.
Мамандар пиротехникалық бұйымдарды қолдану кезінде қауіпсіздік талаптарын сақтауға шақырады.
– Биыл Жетісу өңірінде пиротехника салдарынан жарақат алғандар тіркелген жоқ. Алайда бұйымдарды күн сәулесі тікелей түсетін жерде сақтауға болмайды, себебі жоғары температура өздігінен тұтану қаупін арттырады. Сондай-ақ жауын-шашын кезінде отшашу дұрыс атылмай, қауіп төндіруі мүмкін. Көпқабатты тұрғын үйлердің ауласында салют қолдануға тыйым салынған. Қауіпсіз арақашықтық сақталмаса, отшашу балконға немесе тұрғын үйге түсіп, өртке себеп болуы ықтимал, – деді ТЖД өкілі Еламан Аубакиров.
Оның айтуынша, соңғы жылдары пиротехникадан туындаған өрт оқиғалары тіркелмеген. Алайда салют салдарынан тұрғын үйге, көлікке немесе өзге мүлікке зиян келсе, кінәлі тұлға заң аясында жауапкершілікке тартылады.
Құтқарушылар пиротехникалық бұйымдарды тек рұқсат етілген сауда орындарынан сатып алып, жабық ғимараттарда қолданбауға кеңес береді.
