Біз өмір бойы өзімізді дамытып отырамыз, қабілетімізді шыңдаймыз, сөйтіп жаңа білімге ие боламыз. Әсіресе, қазіргі дамылсыз жүріп жатқан ақпараттық толқын кезеңінде кітап оқып, өзіңді-өзің дамыта білу маңызды.
Біз XXI ғасырда өмір сүреміз. Ғарыш кемесі мен жасанды интеллект ойлап табылды. Ал, кейбіріміз бәз-баяғы оқу деңгейінде қалып қойғандаймыз. Бұған өзіңізді жазғырудың да қажеті жоқ. Себебі, оқу қабілетін әркез дамытып отыру қажет. Мысалы, 11 жыл уақытты мектепте өткіздік қой. Дегенмен, тосыннан физикалық формуланың авторын сұрап қалса, есімізде ештеңенің де қалмағанын түсінеміз. Ал мұны түзету үшін есте сақтау қабілетін дамыту қажет. Өз кезегінде есте сақтауды қалыптастыру үшін механикалық қайталау керек.
Қоғамда кітап оқу қиын, ал оқығаныңды есте сақтап қалу одан да қиын деген қате көзқарастар қалыптасып үлгерді. Шынымен де солай ма? Сізден бір рет болсын қандай қасиетің болғанын қалайсың деп сұраған да болар. Көпшілігі бұл сұраққа ұшу, от шаша білу деп мультфильмдерден көргенін айтады. Ал, оқуды қоспайды да. Егер білім күш болса, оқу – тамаша қабілет емес пе?
Елестетіп көріңізші, кітапты тез оқи білсеңіз, сөреңізде оқылмай тұрған қаншама жаһандық ғалымдардың, психологтар мен тарихшылардың еңбектерімен танысатын едіңіз. Сөйте отыра оқылған әрбір кітапты есте сақтай алсаңыз ше? Тез оқып, тез меңгеру арқылы әлемде толыққанды өмір сүруге мүмкіндік аламыз.
Сөзімнің басында айтқанымдай, сіз неге тез оқымайсыз? Тез оқысам, бар ойыммен беріліп оқи алмай, түсінбей қаламын деп ойлайтын шығарсыз. Шындап келгенде, олай емес. Шайтанарбаны тепкенде тезірек жүруіңіз керек, жай жүрсеңіз тепе-теңдікті ұстай алмай құлап қаласыз. Оқу да дәл осылай. Асықпай оқимын деп отырғаныңызда, талай нәрсені ойлап, ойыңыз өзінен-өзі бөлінеді. Ал, жылдамдық тереңірек үңілуге септігін тигізеді, сіз оқығаныңызды есте сақтай аласыз. Біздің әрбіріміздің мойнымыздың үстінде әлемдегі ең мықты компьютер бар. Ал оны қосу, тек өзіміздің қолымыздан келеді.
Аружан ҚАБДОЛДАЕВА
Алакөл ауданы
