Ауылдық жердің тұрғыны үшін ең бастысы сапалы медициналық көмек пен балаларының тәрбиесіне жағдай жасау. Енді бұл мүмкіндіктер ауыл ішінде қолжетімді болып отыр.
Бесқайнар ауылындағы фельдшерлік-акушерлік пункттің құрылысы 2024 жылдың тамыз айында басталып, «Ауылдық денсаулық сақтауды жаңғырту» ұлттық жобасы аясында салынды. Құрылысын Батыс Қазақстан облысындағы «НСК MBM Constructions» ЖШС жүргізді. Жалпы аумағы 261,8 шаршы метрді құрайтын ғимарат 10 бөлмеден тұрады. Заманауи құралдармен жабдықталған кабинетте фельдшерлік, акушерлік, екпе бөлмесі және физиотерапия секілді бөлімдер орналасқан.
Ал Жетіжал ауылында да дәл осындай ФАП ашылды. Оның құрылысын «Строительная компания Люкс-сервис» атқарды. Екі ауылдағы медициналық пункттерде де екі орта буын медицина қызметкері тұрақты қызмет көрсетіп, амбулаториядан дәрігер аптасына бір-екі рет келіп қабылдайды. Барлық қызмет «Мис Жетісу» атты заманауи ақпараттандыру жүйесі арқылы жүзеге асады.
Ауыл тұрғындары бұл өзгерістерге ерекше қуанышты. Бесқайнар ауылының ақсақалы Жапар Жанұзақов:
– Осы ауылда туып-өстім. Есейдім. Біздің жас кезіміздегідей емес, қазір жағдай жақсы, қуантады. Барлық жақсылық жастарға арналса, солар қызығын көрсе дейміз, – десе, Жетіжал ауылының тұрғыны, көпбалалы ана Алматай Қапан:
– Осыған дейін ауданға баратынмын, енді ауылда ашылып жатыр. Қуаныштымын. Енді бала-шағамды осында қаратамын, – дейді.
Сондай-ақ, үшінші қуаныш Көксу стансысындағы «Талшын» балабақшасының ашылуы. Мұнда 75 бүлдіршінге арналған 3 топ бар. Сонымен қатар, 18 адам тұрақты жұмыспен қамтылды. Жаңа мекеме іші ыңғайлы жиһаздармен жасақталып, заманауи стандарттарға сай жабдықталған. Бұл жас ұрпақтың жарқын болашағына жасалған тағы бір игі қадам.
Ашылу салтанатында сөз сөйлеген Көксу ауданының әкімі Дәулет Халелов тұрғындарды мерекелік сәтпен құттықтап, жаңа нысандардың ауылдық жерлердің әлеуметтік дамуына серпін беретінін атап өтіп:
– Елдің қуанышы – біздің еңбегіміздің нәтижесі. Жаңа медициналық пункттер мен балабақша ауыл тұрғындарының өмір сапасын арттырып, жас буынның болашағына жол аша- ды, – деді.
Көксу ауданындағы бұл үш бірдей жаңа нысан мемлекеттік қолдаудың нақты нәтижесі. Ол ауыл халқының тұрмысын жеңілдетіп қана қоймай, болашаққа деген сенімін нығайтатыны анық.
Санжар СҰЛТАНҒАЗЫ
