Қазақтың ақиық ақыны Мұқағали Мақатаев тірі болғанда биыл 94 жасқа толар еді. Жырларымен жұрттың жүрегінен орын алған алып тұлғаны ұмытпай қадірлеу баршаның міндеті. Осы орайда Талдықорғандағы Жастар саябағында оқушылар ақынның «Алтай – Атырау» шығармасы негізінде поэтикалық қойылым қойып, заңғар қаламгердің ескерткішіне тағзым етті.
Мұқағали Мақатаев атындағы Оқушылар сарайының «Жас актер» поэтикалық театрының ұл-қыздары әуелі ақынның ескерткіш бюстіне гүл шоқтарын қойып, құрмет көрсетті. Бар ықыластарымен шайыр рухына тағзым қылды.
Салтанатты шара әрменқарай поэтикалық қойлыммен жалғасты. Өрендер Жетісу көгін өлеңмен өрнектеді. Мәнерленіп, нақышына келтіріле оқылған жыр жолдары жан тебірентті. Жастардың бұл бастамасы көпке үлгі екені ақиқат.
– Біз Мұқаңның туған күнін 10 жылдан бері осы бюстінің жанында атап өтіп келеміз. Бүгін ақынның «Алтай – Атырау» шығармасын көпшілік назарына ұсынғанды жөн көрдік. Жетісу жері ұлыларын ұлықтаған қасиетті өлке. Сондықтан үлкен болсын, кіші болсын шынайы таланаттарын әспеттегені абзал. Мұқағалидың жырлары, өлең сүйер халқы, артында өскелең осындай ұрпағы тұрғанда атты ешқашан өшіп, ұмытылмақ емес. Ең бастысы өсіп келе жатқан жастарды қанаттандырып, сағын сындырмай баулый білуміз керек, – дейді актер Кендебай Темірбайұлы.
Мұқағали Мақатаев атындағы Оқушылар сарайының «Жас актер» поэтикалық театрының негізін қалаушы, көркемдік жетекшілері ҚР Халық әртісі Алмахан Кенжебекова мен ҚР мәдениет қайраткері Кендебай Темірбайұлы. Олар шәкірттерінің, болашақ жас буынның өркендеуі үшін аянбай еңбек етіп келеді. Аталған театр ұжымы осы уақытқа дейін халықаралық, республикалық 27 фестивальдің бас жүлдесін ұтып, өңір атын шығарып жүр.
Медет Жұмабай
Фото: Жұмабай Мұсабеков
