Жаңа оқу жылы – тек күнтізбелік дата ғана емес, ол – жаңа үміттің, тың серпіннің бастауы. Әрбір сынып бөлмесінде білімге құштар жас жүректердің дүрсілі естілсе, дәліздерде болашақтың нық қадамдары байқалады. Былтыр ғана қолданысқа берілген Панфилов ауданы Жаркент қаласындағы орта мектеп аймақтың бет-беделі десем, артық айтқандығым емес. Баламның жаңа оқу ғимаратында білім алатынына ана ретінде дән ризамын.
Панфилов – облыстағы оқушы саны көп ауданның бірі. Биыл аудан бойынша 1-сыныпқа 2800-ге жуық бала барады екен. Олардың қатарында ұлым Ханәли Кенжебек те бар. Әуелі қуандырғаны – баламның жайлы мектепте білім алатындығы. Себебі, бұл бізге беріліп отырған үлкен мүмкіндік. Оқу ордасының ішкі көрінісі өте әдемі, заманауи талаптарға сай жасалған.
Білім ошағындағы мұғалімдер біздерге кеңінен мағлұмат беріп, мұндағы сыныптармен таныстырып шықты. Бұрынғы мектептермен салыстырғанда әлдеқайда көші ілгері, оқу-ғылымға толықтай бет бұруға қолайлы екенін аңғардым.
«Жаркент қаласындағы орта мектеп» КММ-да 64 кабинет болса, оның алтауы жаңа модификациялық сынып, соның ішінде химия, физика, биология, робототехника, Steam сынды – кабинеттер бар екен. Барлық пән бөлмелері қажетті әдістемелік, техникалық құралдармен жабықталған. Сонымен қатар, ағаш, металл, тігін шеберханалары қарастырылған. Акт залы, 2 оқу залы бар кітапхана, 230 орынды асхана, 2 спорт залы, 1 би залы оқушылардың игілігіне қызмет етеді. Оған қоса, шәкірттердің оқу құралдарына, киімге арналған жеке шкафтар мен кітап оқуға, балалардың шығармашылық дамуы, демалуына арналған коворкинг аймақтары да бар екенін оқу орнындағы ұстаздардан сұрап біліп, аралап көрдім.
Жаркент қаласындағы жаңа мектеп – ата-аналардың жүрегіне үміт пен сенім сыйлаған білім ордасы. Біз мемлекетіміздің «Жайлы мектеп» жобасын қолдай отырып, ұрпаққа сапалы білім мен тәрбиенің іргетасы қаланып жатқанына көз жеткіздік.
Ата-ана ретінде айтарым: бүгінгі күннің баласы – ертеңгі елдің тірегі. Ал жаңа мектеп – сол ұрпақтың асқақ арманына апаратын алтын көпір.
Арайлым МҰҚАШЕВА,
Панфилов ауданының тұрғыны
