Қазақстан халқы Ассамблеясы – тұрақтылық пен бейбітшіліктің кепілі. Елдегі этносаралық келісім мен бірлікті нығайту – мемлекеттің стратегиялық басымдықтарының бірі. Сондықтан қоғамдық институт өз қызметін жаңа деңгейге көтеріп, қоғамдағы өзекті мәселелерді шешуде маңызды рөл атқарып келеді.
Биыл аталмыш институттың құрылғанына 30 жыл толып отыр. Бұл мерейлі дата – тек өткенді саралау ғана емес, сонымен қатар болашаққа бағдар жасау кезеңі. Бұл құрылым алдағы уақытта да Қазақстанның тұрақты дамуы мен бірлігін қамтамасыз ету бағытында ауқымды жұмыстар атқаруды жалғастыра бермек.
Қазақстан халқы Ассамблеясы – бұл тек этносаралық қарым-қатынастарды үйлестіруші ғана емес, сонымен қатар азаматтық қоғамды дамыту, мәдениет пен дәстүрді сақтау, әлеуметтік жобаларды жүзеге асыру сияқты көптеген маңызды бағыттарды қамтитын ұйым. Жетісу өңірі халқының 75,8 пайызын қазақ халқы құрайды. Қалған бөлігі өзге ұлыс өкілдері. 1995 жылдан бері әр ұлыстың өз мәдениеті мен дәстүрін, тілін дамыту мақсатында 21 этномәдени бірлестік құрылды. Облыс орталығында орналасқан Достық үйінде 14 облыстық этномәдени бірлестік өз жұмысын жүргізіп келеді.
Бірлік пен ынтымақты ту еткен құрылым 30 жылдық мерейтой аясында өңірде 69 шара өткізуді жоспарлап отыр. Алғашқылардың легі бойынша қазақ халқының мәдениеті мен салт-дәстүр орталығы ашылды. Орталық халықтың мәдени мұрасын таныстыру, жастарды ұлттық құндылықтарға баулу, сондай-ақ, түрлі этностардың мәдениетін біріктіретін алаңға айналады. 1 наурыз Алғыс айту күнін және Қазақстан халқы Ассамблеясының құрылған күніне орай да ауқымды шаралар ұйымдастырылды. 24 ақпан – 1 наурыз аралығында түрлі челлендждер мен онлайн акциялар, желілік форумдар, «дөңгелек үстелдер» ұйымдастырылды. Еліміздің айтулы мерекелерінде де қоғамдық институт өкілдері қарап қалмады. Халықаралық әйелдер күні, Қарттар күні сынды мерекелерде «Қайырымдылық керуені» ұйымдастырылды. 22 наурызда Ұлттық мерекеге орай «Ортақ шаңырақ» жобасы аясында «Нұрлы наурыз» облыстық байқауы ұйымдастырылды. Бұл шара арқылы ұлттық құндылықтарды насихаттау, қазақтың салт-дәстүрлерін дәріптеу және қоғамда бірлік пен татулықты нығайту мақсат етілді. Сәуірде Студенттік Ассамблеялардың республикалық форумы өтті. Осы жиында студенттік ұйымдар, жастар және білім беру мекемелерінің өкілдері жиналып, тәжірибе алмасты, жарқын идеялармен бөлісті, жастар саясатын дамыту мәселелерін талқылады.
Алдағы уақытқа да толымды бастамаларымыз бар. 1 мамырда еліміздегі түрлі этностардың мәдениеті мен дәстүрлерін насихаттайтын, халықтар арасындағы достықты, бірлікті және ынтымақтастықты нығайтуды көздейтін «Достық дәмі» фестивалін, 4 мамырда Талдықорған қаласында спортты насихаттауға және саламатты өмір салтын насихаттауға бағытталған «Бірлік жүгірісі» марафонын, «Жомарт жан» орталығының ұйымдастыруымен «Шабыт сәті» этнофестивалін өткізуді жоспарлап отырмыз. Әр айға сәйкес және әрбір мерекеге орай ынтымақ пен бірлікке шақырушы шараларды ұйымдастырамыз.
Қазақстан халқы Ассамблеясының 30 жылдығы – тек ұйымның ғана емес, бүкіл елдің ортақ жетістігі. Татулықты ту еткен институттың негізгі ұстанымдары бейбітшілік, келісім және бірлік – Қазақстанның болашақ дамуының берік негізі болып қала береді. Ел ішіндегі тұрақтылық пен татулықтың сақталуы – әрбір азаматтың ортақ міндеті. Сондықтан Қазақстан халқы Ассамблеясы өзінің тарихи миссиясын жалғастыра отырып, елдегі бірлікті одан әрі нығайтуға үлес қоса береді.
Еркебұлан АҚБОЛАТОВ
«Қоғамдық келісім» КММ директоры
Фото: Ашық дереккөз
