Гүльноз Таджиева,
Өзбекстандағы «Mitti olam» баспасының бас редакторы, жазушы, суретші әрі аудармашы:
– Наурыз – халықтың жадында сақталған, ұлттың рухын айқындайтын ерекше мейрам. Көктемнің алғашқы күндерімен бірге келген бұл мереке табиғаттың ғана емес, адамдардың да көңілі мен ниетінің жаңаруын білдіреді. Қыстың ұзақ күндерінен кейін жер бусанып, ағаштар бүр жарып, тіршілік қайта жандана бастағанда, халық та Наурызды үлкен үмітпен қарсы алады.
Бұл күні Өзбекстанның әр өңірінде ерекше мерекелік көңіл күй орнайды. Көшелер ән мен күйге толып, алаңдарда халықтық думандар өтеді. Адамдар ұлттық киімдерін киіп, бір-бірінің үйіне барып, ақжарма тілектерін айтып, татулық пен сыйластықтың белгісін көрсетеді. Үлкендер батасын беріп, жастар ұлттық ойындарға қатысып, ел ішінде шынайы қуаныш пен бірлік сезімі орнайды.
Наурыздың ажырамас дәстүрлерінің бірі – сумаляк әзірлеу. Өнген бидайдан дайындалатын бұл тағам өзбек халқы үшін береке мен молшылықтың нышаны. Үлкен қазанға салынып, түні бойы қайнатылатын сумаляктың басына көршілер мен туыстар жиналып, ән айтып, әңгіме айтып, бір-біріне ізгі тілектерін арнайды. Бұл – жай ғана тағам дайындау емес, адамдарды жақындастырып, ортақ қуанышқа бөлейтін ерекше дәстүр.
Өзбекстандағы Наурыздың басты мәні – адамдарды бірлікке шақырып, ұлттық дәстүрлердің өміршеңдігін көрсетуінде. Бұл мейрам бізге өткеннің өнегесін еске салып, болашаққа деген сенімді арттырады. Наурыз – халықтың жүрегінде сақталған мейірім мен татулықтың, үміт пен жаңарудың жарқын символы.
Барша елді көктемнің жаңару мерекесімен құттықтаймын!
