25 қазан – халқымыздың тарихындағы ең маңызды күндердің бірі. Бұл – тәуелсіздікке жол ашқан, ұлттық рухты жаңғыртқан, мемлекеттілігіміздің негізін қалаған Республика күні.
Осыдан 35 жыл бұрын, 1990 жылдың 25 қазанында қабылданған Мемлекеттік егемендік туралы декларация – Қазақстанның дербес ел ретінде қалыптасуындағы шешуші қадам болды. Бұл тарихи құжат халқымыздың өз тағдырын өзі айқындауға, тәуелсіз мемлекет құруға деген нық сенімін білдірді.
Сол сәттен бастап еліміз жаңа даму жолына түсті. Тәуелсіздік жылдары Қазақстан саяси тұрақтылық пен экономикалық өсімге қол жеткізді, халықаралық аренада өз орнын тапты.
Бүгінде Республика күні – өткенге тағзым етіп, келешекке сеніммен қарау күні. Бұл мереке – еліміздің басты құндылығы – Тәуелсіздіктің бастауы.
Мемлекет басшысы Қасым-Жомарт Тоқаев атап өткендей, «Республика – халық билігінің, теңдік пен әділдіктің кепілі». Осы ұстаным біздің қоғамның жаңа бағдарына айналып, ел дамуының басты бағытын айқындап отыр.
Бүгінгі Қазақстан – заманауи, жаңашыл, әділетті мемлекет құру жолында нық ілгерілеп келеді.
Осы ұлы мереке қарсаңында барша жерлестерімді Республика күнімен шын жүректен құттықтаймын!
Еліміздің әрбір азаматы егемендіктің қадірін ұғынып, Отанымыздың дамуына өз үлесін қоса берсін!
Тәуелсіз еліміздің көк байрағы биікте желбіреп, береке-бірлігіміз баянды болсын!
Қамбарбек САЙРАНБЕКОВ
Жетісу облыстық мәслихатының депутаты
