Сарыөзектің орталық алаңында «Ұлыстың ұлы күні – әз Наурыз» атты ұлттық мереке аудан көлемінде кеңінен және жоғары деңгейде ұйымдастырылып, тұрғындарға ерекше мерекелік көңіл күй сыйлады, – деп хабарлайды 7-su.kz ақпараттық порталы.
Көктемнің жаңаруымен қатар келетін бұл ұлық мереке елді бірлік пен татулыққа ұйыстырып, ұлттық құндылықтарды дәріптеудің жарқын көрінісіне айналды.
Мерекелік жиында аудан әкімі Жанат Жүнісбеков сөз сөйлеп, барша жұртшылықты Наурыз мейрамымен құттықтап, ізгі тілегін білдірді. Ол өз сөзінде әз Наурыздың маңыздылығына тоқталып, бұл күннің халқымыз үшін береке мен ырыстың, жаңару мен жақсылықтың бастауы екенін атап өтті. Сонымен қатар, ел бірлігі мен ынтымағының арта беруіне тілектестік білдірді.
Іс-шара барысында ұлттық нақыштағы концерттік бағдарлама ұсынылып, өнерпаздар әуелете ән шырқап, күмбірлеген күй орындалды. Сонымен қатар, қазақтың байырғы салт-дәстүрлері насихатталып, ұлттық спорт түрлері ұйымдастырылды. Атап айтқанда, қазақша күрес, асық ату, қошқар көтеру және қол күрес сайыстары өткізіліп, тұрғындар белсенділік танытты. Бұл жарыстар мерекенің ажарын ашып, көпшіліктің қызығушылығын арттырды.
Алаңда ұлттық тағамдардан дастархан жайылып, ақ дастархан басында ақжарма тілектер айтылып, ақсақалдар батасын берді. Жастар мен балалар да мерекелік шараға белсене қатысып, көтеріңкі көңіл күймен ерекше әсер алды.
