Биыл Қазақстан халқы Ассамблеясының құрылғандығына 30 жыл. Осыған сәйкес 1 наурыз – Алғыс айту күні Талдықорған қаласындағы Достық үйінде арнайы республикалық желілік форум ұйымдастырылып, ескерткіш тақта орнатылды.
Аймақтағы ҚХА мүшелері, этно-мәдени бірлестіктердің өкілдері, депутаттық топ және жастар қатысқан салтанатты шарада сөз алған Жетісу облысының әкімі Бейбіт Исабаев Мемлекет басшысы Қасым-Жомарт Тоқаевтың құттықтау хатын оқып, ізгі тілегін жеткізді.
– ҚХА-ның жылдар бойы халқымыздың ынтымағын нығайтуға, қоғамдағы өзара түсіністік пен келісімді сақтауға қосқан үлесі өлшеусіз. Ұйымның белсенді қызметі арқылы еліміздегі барлық этностың тілін, мәдениеті мен салт-дәстүрін үйлесімді дамытуға, сондай-ақ, қазақ тілінің этносаралық қатынас тілі ретіндегі мәртебесін көтеруге тың жол ашылды. Ассамблея ұлттың жаңа сапасын қалыптастыру, отаншылдық пен ынтымақтастық, жасампаздық пен жауапкершілік сияқты басты құндылықтарды дәріптеу жолында айрықша рөл атқарады,– делінген ел Президентінің құттықтауында.
Осыдан соң Ассамблеяның құрылу тарихына кеңінен тоқталған Бейбіт Өкісікбайұлы:
– Бүгінде жер жәннаты Жетісуда тарихы ортақ, тағдыры бір 70-тен астам ұлт пен ұлыс бар. Осыған байланысты 1991 жылы тұңғыш рет Талдықорғанда халық жиналысы өтіп, ұлттық мәдени орталықтар қауымдастығы құрылған. Әрі еліміздегі алғашқы Достық үйі де Талдықорғанда ашылды. Қазір өңірде 21 этномәдени бірлестік жұмыс істейді. Олардың бейбітшілік пен келісімді нығайту бағытындағы орны ерекше,– деп атап өтті.
Жиын барысында аймақтың дамуына өз үлестерін қосып жүрген ҚХА ардагерлері, құрылымдық бөлімшелері мен этномәдени бірлестіктердің өкілдері облыс әкімінің Құрмет грамотасы және Алғыс хаттарымен марапатталды. Мерекелік форум өңір өнерпаздарының концерттік бағдарламасымен аяқталды.
Еске сала кетсек, биылғы Қазақстан халқы Ассамблеясының 30 жылдығы аясында Жетісу облысында 70-тен астам кешенді іс-шара өткізу жоспарланған. Ол көп ұлтты өңірдің мәдениеті мен облыстық Ассамблеяның жұмысын паш етеді.
Айдын КӘЛІМХАН
