«Заманына қарай амалы» демекші, сандық технологиялар «Nur Otan» партиясының қызметінде де кеңінен қолданылады. Уақыт өткен сайын саяси ұйым жұмысын цифрландыруға бұруда. Мәселен, кандидаттар партияішілік іріктеу – праймериздің үгіт-насихаттық жұмысында цифрлық технологияға жүгінуде.
Бұл бастаманы жетісулық қатысушылар да қолға алған. «Nur Otan» партиясы Алматы облыстық филиалы төрағасының бірінші орынбасары Жанболат Жөргенбаевтың сөзінше, QR-код қолдану өте ыңғайлы әрі смартфонмен қажетті ақпаратты толығымен алса болады.
— Партия заман ағымына қарай заманауи технологияны пайдалануы қажет. Сол себепті де Алматы облысындағы үміткерлеріміз QR-код қолдану арқылы да үгіт-насихат жұмыстарын жүргізуде. Өңірімізде кез келген тұрғын үміткердің таратпа қағаздағы (брашура) QR-кодпен смартфоны арқылы толыққанды мәлімет алып, сайлауалды бағдарламасымен танысса болады, — деп атап өтті Жанболат Жөргенбаев.
Жалпы, QR-код анықтамасына тоқталып өтсек, QR “Quick Response — шұғыл жауап”. Бұл мобильді телефонның камерасы арқылы жылдам тану үшін ақпарат беретін, екі өлшемді (бар код) штрих-код. QR-кодтың көмегімен кез келген ақпаратты кодтауға болады.
Еске салатын жайт, «Nur Otan» партиясы ұйымдастырып жатқан праймериз, яғни, партияішілік іріктеу 17 тамыз бен 3 қазан аралығында өтеді. Алматы облысында 1080 үміткер қазіргі таңда бақ сынасуда. Олар жер-жерлерде үгіт насихат жұмысын жүргізіп, пікірсайыстарға қатысуда. Бүгінгі таңда 60 мыңға жуық адамның қамтылуымен 2000-ға жуық кездесу ұйымдастырылған.
«ЖЕТІСУ-АҚПАРАТ»
