«Nur Otan» партиясы облыстық филиалы төрағасының бірінші орынбасары Жанболат Жөргенбаев арнайы баспасөз мәслихатын өткізіп, биылғы жылға жоспарланған жобалар мен жұмыстарды таныстырды.
Оның айтуынша, «Nur Otan» партиясы Алматы облыстық филиалының 104 мың 566 мүшесі бар. Олардың бәрі 333 бастауыш партия ұйымының құрамында ел мен жердің өркендеуі және партияның имиджін көтеру жолында аянбай еңбектеніп келеді. Соған байланысты былтыр жалпыұлттық диалогты қамтамасыз ету бағытында көптеген іс-шаралар қолға алынып, игілікті істер атқарылды.
Ардагерлер, ерекше күтімді қажет ететін жандар мен жастар, балалар, ауыл тұрғындары сынды әлеуметтік топтарға қолдау көрсету, көмек қолын созу бағытында 6 партия жобасы жүзеге асырылып келеді. Атап айтқанда, «Ардагерлерді ардақтайық», «Кедергісіз келешек», «Бақытты отбасы» жобалары бойынша ұйымдастырылған 1168 шараға 29 мың 157 адам қатысқан. Сондай-ақ, Жетісу жеріндегі ««Nur Otan» партиясының аумақтық филиалдарындағы қоғамдық қабылдауларда 6229 өтініш тіркелген. Олардың 2960-ына нақты қолдау көрсетілсе, қалған 3269 өтінішке қажетті кеңес берілді. Партия қатарындағы белсенді мүшелерден кадрлық резерв жасақталып, депутаттық фракция жұмысын жандандыру бойынша сайлаушылармен көптеген кездесулер өткізілді. Одан бөлек, Абай Құнанбайұлының 175 жылдығына орай «Ортақ Абай» атты өзге ұлт өкілдерінің арасында мәнерлеп оқу байқауы өткізіліп, қазақ тілін жетік білетін жастар марапатталды.
– Хакім Абайдың 175 жылдығы еліміздің барлық өңірлерінде аталып жатқанын жақсы білесіздер. «Nur Otan» партиясы облыстық филиалы Жетісу жерінде өмір сүріп, халқының рухани-мәдени тұрғыдан оянуына үлес қосып кеткен ақын-жыраулардың шығармаларын жинақтасақ деген ниетіміз бар, – деген Жанболат Әкебайұлы жаңа кітаптың қалай жинақталатынына тоқталды. – Қазір осы жобаны ұйымдастыру жұмыстары жүріп жатыр. Редколлегиясы іріктеліп, өнер, мәдениет, әдебиет салалары мен бұқаралық ақпарат құралдарында жүрген азаматтарды шақырып отырмыз. Жиыны төрт том болатын туындының бірінші томына ақ патшаның тұсында ғұмыр кешкен әйгілі ақын-жыраулар жинақталса, екінші томына Кеңес одағының тұсында шығармашылығы өркендеген ақындардың айтыстары, терме, поэма, дастандары кіргізіледі. Ал, үшінші, төртінші томдарға тәуелсіздік жылдарында жасындай жарқылдаған ақын, жазушылардың шығармалары іріктеледі.
Осылайша «Nur Otan» партиясы облыстық филиалы Жетісу жұртшылығын жаңа жобалармен қуантпақшы.
М. ӘСЕТҰЛЫ
