Наурыз мейрамы қарсаңында Денсаулық сақтау министрлігі тұрғындарға тағам қауіпсіздігіне қатысты маңызды ескертулер жариялады, – деп хабарлайды 7-su.kz ақпараттық порталы.
Көктемнің ең басты мерекелерінің бірі саналатын Наурыз дәстүрлі тағамдардың молшылығымен ерекшеленеді. Мерекелік дастарханда наурыз көже, бауырсақ, ет, қазы, шұжық, қуырдақ, жент сияқты тез бұзылатын өнімдер кеңінен ұсынылады.
Бұл кезеңде тұрғындар азық-түлікті жаппай сатып алып, ата-аналар мектептер мен балабақшаларға түрлі тағамдар апарады. Сонымен қатар елді мекендерде жәрмеңкелер ұйымдастырылып, көпшілік іс-шаралар өтеді.
Осыған байланысты министрлік тағамнан улану және инфекциялық аурулардың алдын алу үшін санитариялық талаптарды қатаң сақтауға шақырады. Мамандардың айтуынша, сақтау мерзімі мен талаптары сақталмаған үй жағдайында дайындалған тағамдарды тұтыну жаппай улануға әкелуі мүмкін.
Министрлік іс-шара ұйымдастырушылары мен қатысушыларға бірқатар талаптарды еске салды. Атап айтқанда, іс-шараларды алдын ала жоспарлау, адамдардың шамадан тыс жиналуына жол бермеу, тағам дайындау және сату барысында санитариялық-эпидемиологиялық нормаларды сақтау маңызды. Сондай-ақ үй жағдайында дайындалған өнімдерді сатуға тыйым салынып, сатушылар арнайы киіммен қамтамасыз етілуі тиіс.
Бұдан бөлек, тез бұзылатын тағамдарды сату кезінде тоңазытқыш жабдықтарын пайдалану, бір реттік ыдыстармен қамту, белгісіз жеткізушілерден алынған өнімдерді сатпау және өнім сапасын растайтын құжаттардың болуын қамтамасыз ету қажет.
Министрлік халыққа арналған жадынамасында ата-аналарға балаларға берілетін тағамның сапасы мен жас ерекшеліктеріне сай болуына ерекше назар аударуды ұсынды.
Сонымен қатар жарақаттанудың алдын алу мақсатында адамдар көп жиналатын орындарда, әсіресе балалармен бірге, барынша сақ болу керектігі ескертілді. Мектептер мен балабақшаларда ата-аналар мен білім беру ұйымдары түсіндіру жұмыстарын күшейтуі тиіс.
Айта кетейік, бұған дейін мамандар наурыз мерекесі кезінде көшеден тамақтанудың қауіптілігі туралы да ескерткен болатын.
