Мемлекет басшысы Қасым-Жомарт Тоқаев бастамашы болған Ұлттық құрылтай аясында еліміздің мәдени мұрасын әлемге таныту және ұлттың рухани құндылықтарын дәріптеу бағытындағы игі істер жалғасын табуда. Осы орайда Жетісу өңірінде «Ой. Рух. Ақыл: Ұлы Дала ойшылдары» атты кітап көрмесінің салтанатты ашылуы өтті. Тағылымы мол шара Ұлы Дала даналарының мұрасын ұлықтап, олардың рухани-философиялық ілімдерін кеңінен насихаттауға арналды.
Мәдени басқосуды облыстық С. Сейфуллин атындағы орталық кітапхана ұжымы ұйымдастырды. Көрменің тұсаукесер рәсіміне зиялы қауым өкілдері, ғалымдар мен ұстаздар, студенттер және облыстық басқармалар мен мекемелердің қызметкерлері қатысты. Салтанатты жиында философия ғылымдарының докторы, абайтанушы Досым Омаров пен I. Жансүгіров атындағы Жетісу университеті филология ғылымдарының кандидаты Сайлау Қожағұлов көрменің тұсауын кесті.
Жиында сөз алған спикерлер ұлы ойшылдардың еңбектері мен тағылымының бүгінгі қоғам үшін маңыздылығына ерекше тоқталды. Олар ұлттық руханиятты жаңғырту ісінде тарихи тұлғалардың шығармашылық және философиялық мұрасын дәріптеу – уақыт талабы екенін атап өтті.
Көрме барысында «Ясауи ілімі және адамгершілік құндылықтар», «Музыка, логика, философия: ұлы ойшыл әл-Фараби мұрасы», «Хакім Абай және толық адам ілімі» атты бөлімдерге арнайы библиографиялық шолу жасалды. Аталған бөлімдерде Әбу Насыр әл-Фараби, Қожа Ахмет Ясауи және Абай Құнанбайұлы еңбектері мен олар туралы ғылыми зерттеулер көпшілік назарына ұсынылды. Қатысушылар рухани мұраның терең мазмұнымен танысып, ойшылдар ілімінің өзектілігіне қанықты.
Ұлы ойшылдардың мұрасы – өткеннің еншісінде қалған қазына емес, бүгінгі және келер ұрпаққа бағыт-бағдар беретін рухани темірқазық. «Ой. Рух. Ақыл: Ұлы Дала ойшылдары» атты көрме – ұлттық құндылықтарды ұлықтап, жас ұрпақтың тарихи санасын қалыптастыруға бағытталған мазмұнды әрі тағылымды мәдени шара ретінде жоғары деңгейде ұйымдастырылды. Бұл бастама – рухани жаңғыру жолындағы жүйелі жұмыстардың жарқын көрінісі.
Әсем ИШАМБАЕВА,
облыстық С. Сейфуллин
атындағы орталық
кітапханасының оқырмандарға қызмет көрсету бөлімінің
меңгерушісі
