Қолөнермен талмай еңбектенгеннің арқасында «Бір ауыл – бір өнім» жобасының жартылай финалисі атанды. Мәуейхан Құралбай – зергерлік бұйымдар шебері. Оның әшекей жасауға деген қызығушылығы алғашында отбасылық хобби ретінде басталған. Ал қазір ол өзінің сүйікті кәсібіне айналды. Кәсіпкер жоғары сапалы күмістен жасалған, сәнді дизайн мен беріктігі үйлестірілген әсем бұйымдар дайындайды.
Ол үшін күміспен жұмыс – жай ғана кәсіп емес, әр бұйымға қолдың жылуы мен жанның бір бөлшегін беру мүмкіндігі. Халық мәдениетінде күміс даналық, тектілік және жылулық пен үміттің символы саналады. Мәуейхан әр бұйымына осы құндылықтарды сіңіре отырып тер төгеді. Оның жасаған әшекейлерін күнделікті өмірде де, ерекше сәттерге де қолдануға болады. Ол өнім иесінің даралығы мен талғамын айшықтайды.
«Бір ауыл – бір өнім» жобасының жартылай финалына шығуы – шебердің кәсіби шеберлігін және өзіндік стилін мойындау болды. Бұл кезең оның қолөнерін дамытуға және ұлттық зергерлік өнерді насихаттауға жаңа мүмкіндіктер ашты.
А. БАЙЖҰМАҚЫЗЫ
Алакөл ауданы
