Бала кезінен өнерге, әсіресе, сурет салу мен ағаштан әртүрлі өрнекті зат жасап, тас қашауға әуес болып өскен жаркенттік Мұрат Шалғынбаев орта мектепті тәмамдасымен бірден Алматы қаласындағы көркемсурет училищесіне оқуға барды.
Өнер әлеміне талай саңлақ суретшілер мен мүсіншілерді, қолөнер шеберлерін шыңдап шығарған білім ошағы Мұраттың да бала арманын ұштап, өмірлік мақсатына жол салғаны анық. Ол осында қылқалам құдіретін ұғып, кенеп бетіне сурет салу сыры мен түрлі түсті бояуларды үндестірудің мектебінен өтті. Оқуын тәмамдаған соң 1984-1985 жылдары Қаз КСР көркемсурет қорының Көкшетау қаласындағы шеберханасында суретші, одан кейін әскер қатарына шақырылып, борышын өтеп оралған соң туып-өскен жеріне, еліне келіп «Жаркент мешіті» көркем-сәулет мұражайында суретші-реставратор, осы мекеме жанынан құрылған «Қазына» көркемсурет шеберханасының жетекшісі қызметін атқарып, 2000 жылдан бері «Ә. Қастеев көркемсурет галереясында» еңбек етіп, дара суретшінің ізбасарына айналған. Қайда жүрсе де бойындағы өнерін шыңдап, қылқаламынан қол үзген емес.
Әбілхан Қастеевтей хас шеберді әкелген өңірде көркемсурет өнерінің бәсі жоғары. Сол бір шоғыр шебердің ортасында Мұрат Шалғынбаев өзіндік қолтаңбасын танытқан таланттардың бірі. Оның қылқаламынан туындаған «Әулиеағаш», «Түнгі Астана», «Талдықорған», «Астананың болашағы», «Толғау» атты туындылары еліміздің түкпір-түкпірінде өткізілген көптеген көрменің сәнін кіргізгені анық.
Мұрат кейінгі жылдары металдан, ағаштан, теріден сан түрлі қолөнер бұйымдарын, ұлттық ою-өрнектерді, тұрмыста қолданатын бұйымдарды жасауды да қолға алыпты. Оның қолынан шыққан алдаспан қылыш, теріден жасалған қобдиша, құдағи жүзік, қыз алқасы, тағы басқа да көптеген бұйымы талғампаз халықтың қалауы болып жүр. «Шебердің қолы ортақ» демекші, мерейтойлар мен құдандалы болғанда оған жерлестері қыз жасауына қажет, құрметті қонағына сый-сияпатқа жүзік, білезік, қыз алқасы сынды ұлттық бұйымдарына тапсырыс береді.
Бүгінде отандастарымыз, шет- елдерден келген қонақтар қазақтың қолөнер бұйымдарын қызыға тамашалап, қалап сатып алып кететінін байқаймыз. Халқымыздың ежелден қалыптасқан қолөнерін қайта жаңғыртып, замана талабымен астастыратын Мұрат сияқты ұлтжанды өнерпаздарымыз көбейген сайын ұлттық болмысымыздың салмағы, қадір-қасиеті арта бермек.
Мырзағали НҰРСЕЙІТ
Жаркент қаласы
