Іле ауданының тұрғыны 52 жастағы Динар Дүйсенованың кәсіпкерлік саласында жүргеніне биыл төрт жыл. Ол 2017 жылы «Еңбек» бағдарламасы аясында «Бастау» жобасы бойынша білім алып, оқыту жобасының алғашқы түлектерінің бірі болды. Сол кезде ол «Бастау» арқылы мақсатын жүзеге асыратынына сенбеген еді.
Динар ханым мамандығы бойынша тері жөніндегі инженер-технолог және агрохимик. Ұзақ уақыт бойы кәсіпорындар мен ветеринарлық зертханаларда жұмыс істеді. Ол кезде шағын қожалығы болғанымен толыққанды кәсіпкерлік қызметті жүргізу үшін қаражат қажет болды. Әрдайым өз ісін ашуды армандаған. Сондықтан, «Бастау» оқуына нақты жоспарымен келді. Мал шаруашылығымен айналысып, сүт өнімдерін шығаруды мақсат етті.
– Еліміз ауылшаруашылығын дамытуға бағыт алды. Бұл өз идеяларымызды жүзеге асырудың, ата-бабаларымыздың ісін жалғастырудың тамаша мүмкіндігі. Өз ауылымның өркендеуіне үлес қосып, Қазақстанның үздік 30 шаруашылығының қатарына қосылғым келеді. «Бастау» жобасына, кәсіпкерлер палатасына ризамын. Себебі, өмірім түбегейлі өзгерді. Қай жерге барсам да адамдарға «Атамекенге» оқуға жазылып, жаңа дағдыларды үйренуге шақырамын, – дейді кәсіпкер.
2017 жылы Динар Дүйсенова «Игілік» бағдарламасы бойынша 6 миллион теңге несие алып, ол қаражатқа сиыр, жылқы, ешкі және қой сатып алды. Шаруашылықтың жері кеңейді. Содан кейін олар сулугуни, брынза, ешкі сүтінен құрт жасай бастады.
– Әр апта сайын демалыс күнгі жәрмеңкеге қатысамыз. Онда өнімдеріміз лезде сатылып кетеді. Бәрі табиғи өнім. Өткен жылы «Сыбаға» бағдарламасы бойынша 50 миллион теңге көлемінде несие алдық, – дейді кәсіпкер келіншек.
Динардың шаруа қожалығы ай сайын 500 литр сүт шығарып, сүттен қаймақ, май, айран, брынза, чечел, ірімшік, құрт, йогурт, сүзбе, сулугуни сияқты 12 түрлі өнім сата бастады. 2020 жылы коронавирус пандемиясына байланысты кәсіптің қарқыны төмендеді.
– Карантиндік шараларға байланысты жәрмеңкелер ұйымдастырылмаған соң өнімді өткізу қиынға соқты. Бұған қарамастан, биыл өнім көлемін ұлғайтуды мақсат тұтып отырмыз, – дейді Динар.
«Бастау» түлегі жас кәсіпкерлердің жобаларын ауылдық жерлерде іске асыруға шақырады. Себебі, ауылдарда ашылмаған кәсіп түрі көп әрі оны дамытуға мүмкіндіктер жеткілікті.
Динар бизнеспен қатар белсенді қоғамдық және қайырымдылық қызметін жүргізеді. Іле ауданы Междуреченск ауылының қоғамдық кеңесінің мүшесі әрі бастамашыл әйелдер кеңесінің құрамында. Көпбалалы және аз қамтылған отбасылардан шыққан балаларды жүйелі түрде жан-жақты қолдап келеді.
Облыстық кәсіпкерлер палатасының бизнес-тренері Гүлмира Бағжаева: «Бастау» бойынша оқу басталған алғашқы сабақта мен Динарды үлгі етіп, жобаның нәтижесі туралы өз аузынан айтып беруге шақырамын. Қатысушыларға тамаша мотивация береді. Ол шағын ғана ауылда жүріп үлкен іс ашуға болатынын жақсы дәлелдеген кәсіпкер», – деді.
Айта кетейік, «Бастау» жобасы сәуір айында басталады деп жоспарлануда.
Айгүл БАЙБОСЫНОВА
Алматы облысы
