Көктал кентінде тұратын Ерслан Оспанов жаңалыққа жаны құмар жастың бірі. Ол 2019 жылы «Атамекен ұлттық палатасының» Жаркент қаласындағы филиалында «Бизнес–бастау» бағдарламасы бойынша білім алып, сертификат иеленді. Содан кейін пластиктен есік-терезе секілді тұрмысқа қажетті заттар жасайтын шағын кәсіпорын ашуға бел буған болатын.
Өзі осы істі басқа бір кәсіпкерге бірер жыл жалданып жұмыс істеп жүріп үйренеді. Үйренгенін өз үйінде жүзеге асырып, ауылдастарына пластиктен есік-терезе жасап, табысты іске кіріскен. Алайда заң колледжін тамамдап, ауданда заңгерлік қызметке қолы жетпеген жұмыссыз бозбаланың жаңа кәсібін өрістетуіне қаржы тапшылығы қолбайлау болды. Ақыры биыл жаңа жобасы Ұлттық палата тарапынан қолдау тауып, оған 580 мың теңге қайтарымсыз қаржы берілді. Бұл ақшаға қолда бар табысын қосып құрал-сайман мен жұмысқа жарататын әйнек, пластик сатып алды.
– Аз да болса бұл қаржы қолдау болды, – дейді Ерслан. – Күнделікті жұмысыма қолданатын құрал-сайман болмаса іс өнбейді. Қазір жұмысым алға басты, аптасына кем дегенде 2-3 тапсырыс түседі, жылдам, сапалы орындауға тырысамын. Қалдық темірлер мен пластиктерді өткізіп, табысыма қосып құрылыс материалдарын сатып алып жүрмін.
Шеберге күнделікті жұмысында зейнеткер әкесі Жамбыл көмектеседі екен. Жақында үйленіпті. Болашақта кәсіпкерлікте кеңге құлаш сермейтін арманы да бар.
М. Манапұлы
Көктал кенті
