Табиғи сүттен түрлі өнім жасайтын Райгүл Закария Сарқан ауданының тұрғыны.
Кәсіпкер бүгінде «Бір ауыл – бір өнім» жобасының жартылай финалисі. 2019 жылы Райгүлдің отбасы туған жеріне оралу туралы шешім қабылдады. Әрине, алғашқы кезеңдерде оңай болған жоқ. Мәселен ол өмірлік қиындықтар, тұрақты табыс көзін табу сияқты проблемаларға жолықты. Дәл осы сәтте ұлттық дәстүрлерге негізделген жеке кәсіп ашу туралы ой туды. Осылайша сүт өнімдерін өндіру жолы басталды.
Саумал, қымыз, құрт, жент, ірімшік, басқа да өнімдер – бұл жай ғана ұлттық тағамдар емес, бұл – табанды еңбек, салт-дәстүрге сүйіспеншілік және дамуға деген ұмтылыстың нәтижесі. Сол өнімдердің бірі – саумалдан жасалған балмұздақ. Ол – дәстүр мен заманауи тәсіл үйлескен ерекше әрі пайдалы өнім. Райгүл «Бір ауыл – бір өнім» жобасына екінші жыл қатарынан қатысып, табандылығының арқасында биыл жартылай финалға өтті. Жобаға қатысу – өзін көрсетуге мүмкіндік қана емес, сонымен бірге бизнесті одан әрі дамытуға үлкен серпін болды.
Кәсіпкер енді өндірісті кеңейтіп, жаңа өнім түрлерін шығаруды және ауыл тұрғындары үшін жұмыс орындарын ашуды жоспарлап отыр. Райгүл Закарияның бүгінгі өмірі кәсіпкерлік бастамаларға белсенді қатысу арқылы қиындықтарды жеңіп, тұрақты бизнес құруға болатынын дәлелдейтін шабыттандырарлық үлгі.
Айгүл БАЙБОСЫНОВА
Сарқан ауданы
