«ШЫМЫРЛЫҚТАРДЫҢ» ҮЛЕСІ

Облыс орталығы Талдықорғанға  көшіп келгендегі қаланың жағдайын білетін тұрғындар бүгінгі түрленген келбетін көріп еріксіз таңғалатыны белгілі. Әрине, бұл үшін қалалықтар жанын сала еңбектенді. Әсіресе, осындай керемет жағдайға жетуге құрылыс саласындағы құрышқолды жұмысшылар мен құрылыс компанияларының үлесі аз болған жоқ. Соның ішінде Талдықорған облыс орталығы болуымен бірге іргесі қаланып, іргелі істер атқарған “Шымыр” жауапкершілігі шектеулі серіктестігін ерекше атауға болады.

«Шымыр» жауапкершілігі шектеулі серіктестігі тапсырыс бойынша құрылыс материалдарын әзірлейді. Сонымен бірге, көпқабатты үй құрылыстарын салумен де айналысады. Басқасын айтпағанның өзінде “Шымырлықтардың” тері сіңген Қаратал жағалауындағы аллея бүгінде қалаға көрік берумен қатар тұрғындардың бос уақытында тынығып, көңіл сергітіп қайтатын демалыс орнына айналды. Одан бөлек, қала көркін ашқан бірқатар көпқабатты тұрғын үйлерге қолданылған құрылыс материалдарының да “шымырлықтардың” қолынан шыққанын білеміз. 
Қала ішіндегі және маңындағы саябақтар мен Талдықорған қаласынан әуежайға дейінгі жол бойындағы түрлі мүсіндердің де “Шымыр” серіктестігі шеберлерінің қолынан шыққанын біреу білсе, біреу білмес. «Шымырда» дайын өнімдер көп-ақ. Тұмар ханшайым, Алтын адам сынды күрделі кескін-пішін, ескерткіштер де, қозы ұстаған бала, домбыра, сақина сынды қарапайым мүсіншілер де бар. Қай-қайсы да қаланың көпшілік орындарына сұранып — ақ тұр. Мәселен, әуежай маңындағы жол бойына орналастырылған жылқылар мен қазақы үлгіде киіндірілген аңшы жігіттің мүсіні жұртшылықты таңғалдырып келеді. Одан әрі арқар, елік, асық, ұлттық музыкалық аспаптар сынды мүсіндер де жұртшылықтың қызығушылығын тудыруда.  Олар жасаған мүсіндер тек Талдықорған қаласының ғана емес,  Жетісу өңірінің түкпір-түкпірінің келбетін көріктендіріп тұрғанын айта кеткен жөн. 
Аталған серіктестікті құрған, барлық жұмысын жүйелеп отырған басшысы Руслан Валишанов бүгінде жұрт қамын жеп жүрген халық қалаулысы. Бірнеше мәрте Талдықорған қалалық мәслихатының депутаты болып, өңірдің дамуына ықпал ететін талай игілікті жұмыстың басы-қасында болды. 
Айта кетерлігі, аталған серіктестік тек құрылыс материалдарын өндіріп, мүсіндер жасап қоймай, түрлі қайырымдылық шараларына да мұрындық болып келеді. Қазір серіктестікте 200-ге жуық адам жұмыспен қамтылған. Жұмыс қарбалас болған тұста жұмысшы саны 500-ге дейін жетеді.  Қала тұрғындарын қолдап, қашанда қиналған жандардың қасынан табылып жүрген Руслан Валишановты бәрі құрметтейді.  Осы арқылы да жұртты жұмыспен қамтудың үлгісі болып  келеді. “Еңбегі бардың өнбегі бар” деген осындайға айтылса керек.   

Қажет АНДАС