«Бір ауыл – бір өнім» жобасына қатысушылар аз уақыт ішінде істі бастап, оны одан әрі дамытуға болатынын айтты.
Кербұлақ ауданынан келген Татьяна Юрчук бір жыл ішінде табиғи сүт өнімдерін өндіріп қана қоймай, жобаның жартылай финалына шығып та үлгерді. Татьяна Қонаев қаласынан Аралтөбе ауылына көшіп келген. Бұл ол үшін өмірінің жаңа кезеңі болды. Кәсіпкер бұрын сұлулық салонында жұмыс істеген. Кейіннен өзін басқа салада сынап көруді жөн санап, табиғи өнімдер өндіруге кірісті. Ғаламтор кеңістігінен сүттен ірімшік әзірлеудің әдіс-тәсілімен танысып, қыр-сырын үйренді.
Бұдан соң осы салада білімін тереңдетуді ойлап, Астанаға барды. Сол қаладан ірімшік жасауды оқып, кәсіби дағдысын тереңдетуге мүмкіндік алды. Нәтижесі көңіл қуантады. Өйткені, оның өнімдері бүгінде Жетісу облысында ғана емес, сондай-ақ, Қонаев пен Алматы қалаларында да танымал әрі үлкен сұранысқа ие. Қазіргі таңда қатты және жұмсақ ірімшіктің лабне, белпер кнолле, фета, адыгей сияқты он екі түрі бар.
Сонымен бірге, сүзбе, қаймақ және май шығарады. Кәсіпкердің басты қағидасы – табиғи сүттен сапалы өнім шығару. Барлық өнім тек жергілікті сүттен жасалады. Ол сонысымен де ерекше әрі дәмі мен балғындығы және пайдасымен де тұтынушыларын баурай алады.
– «Бір ауыл – бір өнім» жобасы кәсіпкерлікті дамыту үшін жаңа мүмкіндіктер ашатынын айқын көрсетеді. Сондықтан, мұндай бастамаларды қолдау маңызды. Өйткені ол басқа да азаматтарды шабыттандырып, аймақ экономикасының өркендеуіне үлес қосады. Біз өз ісін дамытып, алға жылжытқысы келетін азаматтарға қолдау көрсетеміз, – дейді облыстық кәсіпкерлер палатасының директоры Дәурен Оңалбаев.
«Бір ауыл – бір өнім» жобасына қатысу Татьяна үшін нағыз дебют болды. Өйткені, ол таныстарының жоқтығына, осындай байқауларға қатысу тәжірибесінің аздығына қарамастан іріктеу кезеңінен сәтті өтіп, үздік ондыққа кірді.
– Бәрі қызық болды. Себебі, мен бұл жерде ешкімді танымадым. Соған қарамастан алға қарай талпындым. Жоба маған үлкен серпін берді. Жартылай финалға шығу дұрыс бағытта келе жатқанымды аңғартты. Ал менің өнімдерім шынымен жоғары сұранысқа ие, – дейді Татьяна Юрчук.
Кәсіпкердің алдағы күндеріне деген сенімі жоғары. Енді ол өнім түрлерін көбейтіп, өндірісін ұлғайтуды және жаңа жұмыс орындарын құруды ойлап отыр.
Айгүл БАЙБОСЫНОВА
