Футзалдан ел чемпионатының шешуші кезеңі болып жатыр. Үздік 8 команда плей-офф сатысында жеңімпазды анықтап жатса, турнирлік кестеде 9-орын алған «Жетісу» келесі маусымда Премьер-лигада қалу үшін Бірінші лигада 2-орын алған «Елім-ай» (Көкшетау) клубымен ойнап жатыр. Екі команда арасындағы Талдықорғанда өткен 1-кездесеуде 3:5 есебімен «Жетісу» жеңілді. Қарымта ойын 28-інші мамырда Астана не Көкшетау қаласында өтеді. Егер «Жетісу» жеңіп кетсе, онда 3-ші матч болады.
Келесі жылы Премьер-лигада ойнау үшін екі командада барын салып, жанын берді. «Елім-ай» Талдықорғанда қосалқы құрамсыз келіп (5 ойыншымен), жеңісті жұлып алды. Гол салғандар Нұрлан Омаров хет-трик (8, 9. 19 минуттарда) және Серікжан Тайкенов (31) пен Жәнібек Сейітжан (36) көзге түсті. Ал «Жетісу» сапынан Аят Мұсабаев (10), Нұрислам Рахимов (17) және Бексұлтан Тілеухан (40) гол салды.
«Жетісу» биылғы Премьер-лигадағы ең жас команда және легионерсіз ойнады. Командадағы ойыншылардың арасынан 19 жастағы Мади Маратұлы 29 гол салып, 11 пас берді. Одан бөлек 21 жасқа дейінгі ойыншылардың арасынан 18 жастағы Аят Мұсабаев (20 гол, 13 пас), 20 жастағы Жанасыл Алмасұлы (12 гол, 15 пас), 21 жастағы команда капитаны болған Ерназар Бекбосынұлы (13 гол, 12 пас) және 18 жастағы Бексұлтан Тілеухан (12 гол, 13 пас) сынды ойыншылар айрқыша көзге түсті.
«Жетісу-Ақпарат».
