Қазақстан Республикасының Сыртқы істер министрі Ермек Көшербаев «ExxonMobil» компаниясының аға вице-президенті Питер Ларденмен маңызды кездесу өткізді, – деп хабарлайды 7-su.kz ақпараттық порталы.
Кездесу барысында тараптар «ExxonMobil» компаниясының Қазақстандағы қызметін, соның ішінде еліміздің экономикасына тікелей әсер ететін негізгі энергетикалық жобаларды талқылады. Министр Е. Көшербаев компанияның Қазақстанның мұнай-газ саласындағы сенімді әріптес екенін атап өтіп, оның стратегиялық жобаларды іске асыру мен энергетикалық нарықтың тұрақтылығын сақтаудағы рөліне жоғары баға берді.
Сондай-ақ компанияның Қазақстан Республикасы Президенті жанындағы Шетелдік инвесторлар кеңесінің жұмысына белсенді қатысуы мен инвестициялық ахуалды жақсартуға қосқан үлесі ерекше аталды.
Өз кезегінде Питер Ларден Қазақстанның шетелдік инвесторлар үшін жасап отырған қолайлы жағдайларына ризашылығын білдірді. Ол республиканың энергетика саласын орнықты дамыту мақсатында ұзақ мерзімді ынтымақтастықты жалғастыруға ниетті екенін жеткізді. Бұл – еліміздің әлемдік энергетикалық картадағы беделін нығайтып, жаңа технологиялар мен капиталдың келуіне жол ашатын оң қадам.
«ExxonMobil» компаниясы Қазақстан нарығына 1993 жылы келген және содан бері ең ірі шетелдік инвесторлардың бірі болып қала береді. Бүгінде компания келесідей стратегиялық маңызды жобаларға қатысуда:
-
Теңіз кен орны;
-
Қашаған жобасы;
-
Каспий құбыр консорциумы (КҚК) арқылы мұнай тасымалдау.
Бұл ынтымақтастық тек шикізат өндіру емес, сонымен қатар жергілікті кадрларды оқыту, әлеуметтік жобаларды қолдау және инфрақұрылымды дамыту тұрғысынан да маңызды. Конструктивті серіктестік алдағы уақытта еліміздің экономикалық әлеуетін арттыра түспек.
