Қазақстанда 10 қарашада бекітілген жол жүрісі ережелеріне өзгерістер мен толықтырулар ресми түрде күшіне енеді. Жаңа талаптар жүргізушілердің қауіпсіздігін арттыруға және жаяу жүргіншілерді қорғауға бағытталған.
Жүк көліктеріне жаңа жылдамдық шектеуі енгізілді
Елдімекендер аумағында жүк көліктері үшін жылдамдық сағатына 50 км-мен шектеледі. Бұл шектеу тек арнайы жол белгілерімен жоғары жылдамдық көрсетілген учаскелерге қолданылмайды.
БҰҰ Дүниежүзілік денсаулық сақтау ұйымының мәліметіне сүйенсек, жылдамдық 60-65 км/сағ болғанда жаяу жүргіншінің қаза болу қаупі 50 км/сағ жылдамдықпен салыстырғанда 4,5 есе көп.
Көріну нашар кезде колонна қозғалысына жаңа талаптар енгізілді
Боран, тұман, жауын-шашын кезінде колоннамен жүру тәртібі жаңартылды:
-
колонна ішінде маневр жасауға, басып озуға және өздігінен тоқтауға тыйым салынады;
-
колоннада көлік саны 10-нан асса, екі патрульдік көлікпен міндетті түрде ілесіп жүру қажет;
-
М2 және М3 санатындағы барлық автобусқа жолаушыларды отырғызу және түсіру үшін аялдамаларда тоқтауға рұқсат берілді.
Маяктарды қолдану тәртібі жеңілдетілді
Ірі көлемді және қауіпті жүктерді, велосипедшілер колоннасын және балалар тасымалдайтын автобустарды ілесіп алып жүру кезінде:
-
магнитті бекітпесі бар қызғылт сары немесе сары жарқылдауық маяктарды
қосымша рұқсатсыз пайдалануға болады.
Бұған дейін мұндай маяктар үшін арнайы рұқсат алу талап етілетін.
Жол парағының электронды формасына рұқсат берілді
Енді жүргізушілер жол парағын электрондық форматта қолдана алады. Сонымен қатар визуалды қабылдауды жақсарту мақсатында барлық жол белгілері мен таңбалар цифрландырылды.
