Алматы іргесіндегі ірі сауда нүктесі «Алтын Орда» базарының төңірегіндегі шу қайта өршіп жатыр. Базардың бұрынғы иесі Айдарбек Құсайынов экс-президенттің жиені Нұрбол Назарбаевты сотқа беріп, одан 15 млрд теңгеден астам қаражат талап етті, – деп хабарлайды 7-su.kz ақпараттық порталы Stan.kz сайтына сілтеме жасап.
Іс бойынша сот арызды өндіріске алып, жауапкердің мүлкі мен банктік шоттарына талап етілген сома көлемінде шектеу қойды. Мұндай қадам болашақта сот шешімі шыққан жағдайда, оның орындалуын қамтамасыз ету үшін жасалады. Талап қоюшы Айдарбек Құсайынов жауапкер тарапты «негізсіз баю» арқылы орасан зор пайда тапты деп айыптап отыр. Нақтырақ айтсақ, ол Нұрбол Назарбаевтан 15 млрд 171 млн теңге өндіруді көздейді.
Даудың тамыры тереңде жатыр. Айдарбек Құсайынов 2013 жылға дейін «Алтын Орда» базарына иелік еткен «Kurylys LTD» компаниясының 39 пайыз үлесіне ие болған еді. Алайда сол кезеңде базарды Болат Назарбаевтың атына рәсімдеу бойынша түрлі әрекеттер басталған.
Сот материалдарына сүйенсек, Құсайынов өз үлесін нарықтық бағадан әлдеқайда төмен сомаға, яғни 1,3 млн долларға сатуға мәжбүр болғанын алға тартады. Кейіннен бұл іс бойынша рейдерлік фактілері анықталып, кінәлі тұлғалар жауапқа тартылған болатын. 2022 жылғы Қаңтар оқиғасынан кейін Мемлекет басшысы Қасым-Жомарт Тоқаев базардағы заңсыздықтарды жойып, тәртіп орнатуды тапсырған соң, бұрынғы иелері өз құқықтарын қорғауға қайта кірісті.
Болат Назарбаев қайтыс болғаннан кейін оның активтері мен бизнестегі үлестері ұлы Нұрбол Назарбаевқа өткен. Құсайыновтың айтуынша, базар жылына 12–15 млрд теңге табыс әкеледі. Ол өзінің он жыл бойы иеліктен айырылуы салдарынан шамамен 50 млрд теңге пайдадан қағылғанын айтады.
Қазіргі таңда сот ісі жалғасып жатыр. Процесс елдегі активтерді қайтару және әділдікті орнату жолындағы маңызды қадамдардың бірі ретінде қарастырылады. Іс тек қана өткеннің дауын шешу емес, алдағы уақытта ірі бизнес нысандарында ашықтық пен заңдылықты қамтамасыз етуге жол ашады.
