Жамбыл облысында әскери борышын өтеп жүрген сарбаз қаза тапты. Алдын ала мәлімет бойынша, жауынгер қарумен жұмыс істеу кезінде өзіне оқ тиіп мерт болған, – деп хабарлайды 7-su.kz ақпараттық порталы Qazaqtoday ақпарат агенттігіне сілтеме жасап.
Бас прокуратураның хабарлауынша, бұл оқиға 27 қаңтарда болған. Қазіргі таңда Ішкі істер министрлігінің әскери-тергеу органдары сотқа дейінгі тергеу амалдарын бастап кетті. Жағдайдың мән-жайын толық әрі объективті анықтау үшін арнайы жедел-тергеу тобы құрылды. Істің барысын Бас прокурор жеке бақылауына алды.
Оқиға орнына жағдайды жан-жақты зерделеу үшін Қорғаныс министрінің орынбасары, Бас әскери прокурор және ІІМ Әскери-тергеу департаментінің бастығы жіберілді.
Кейінгі кезде әскери бөлімдердегі оқыс оқиғалардың жиілеуі қоғамда үлкен алаңдаушылық туғызып отыр. Осыған байланысты арнайы топқа елдегі барлық әскери бөлімдердегі тәртіп пен жеке құрамның қауіпсіздік талаптарын қатаң тексеру тапсырылды.
Жақын арада Бас прокуратураның арнайы алқа отырысы өтеді. Онда келесі мәселелер талқыланбақ:
-
Әскери қызметшілердің өмірі мен денсаулығын сақтау;
-
Мерзімді қызметтің қауіпсіздігін қамтамасыз ету;
-
Әскери бөлімдердегі психологиялық ахуалды жақсарту.
Сарбаз өлімі бір апта ішіндегі екінші қайғылы жағдай. Бұған дейін, 23 қаңтарда Шығыс Қазақстан облысының Жаңғызтөбе кентінде орналасқан 47007 әскери бөлімінде қарауылда тұрған сарбаз өзіне оқ атқан болатын. Мұндай оқиғалардың қайталануы әскердегі тәрбие жұмысы мен қауіпсіздік ережелерінің сақталуын түбегейлі қайта қарауды талап етеді.
