Қазақстанда банк клиенттері үшін тиімді өзгерістер күшіне енді. Енді ағымдағы шоттағы қаражатқа сыйақы есептеуге рұқсат берілді. Осыған дейін тыйым салынған үдеріс Мемлекет басшысы қол қойған жаңа заңнамалық түзетулер аясында қайта жаңғыртылды, – деп хабарлайды 7-su.kz ақпараттық порталы Ng.kz сайтына сілтеме жасап.
Сыйақы мөлшері шотта іс жүзінде жатқан ақша сомасына қарай есептеледі. Банк шоттағы қалдықты бақылап, оған белгілі бір пайыздық мөлшерлемені қолданады. Кейін барлық есептелген сомалар жинақталып, клиенттің шотына түседі.
Мәселен, шотта 100 мың теңге жатса және жылдық мөлшерлеме 1 пайыз болса, жыл соңында шамамен 1 мың теңге табыс алуға болады. Егер клиент ақшаны алып тастаса немесе үстіне жаңадан сома қосса, пайыз шотта нақты қалған ақшаға ғана қайта есептеледі.
Ағымдағы шоттарға сыйақы төлеу тәжірибесі Қазақстанда 1999 жылдан бері қолданылып келген болатын. Алайда 2019 жылғы 1 қаңтардан бастап Азаматтық кодекстің 751-бабына жаңа норма енгізілді. Ол норма бойынша: «Ағымдағы банк шотындағы ақшаны пайдаланғаны үшін сыйақы төленбейді» деген тікелей тыйым салынды.
Ұлттық банк сол уақытта ағымдағы шоттар тек күнделікті операцияларға – аударымдар мен сатып алуларға арналған, ал ақша жинау үшін депозит ашу керек деген ұстанымда болды.
2026 жылғы 16 қаңтарда Президент Қасым-Жомарт Тоқаев банктер туралы жаңа Заңға және соған сәйкес түзетулерге қол қойды. Аталған құжат банк лицензияларының жаңа түрлерін енгізіп, цифрлық активтерді реттейді және банк операцияларының мүмкіндіктерін кеңейтеді. Ең бастысы, бұл өзгерістер банк клиенттерінің құқықтарын қорғауды күшейтіп, олардың өз қаражатынан қосымша табыс табуына жол ашады.
Ендігі кезекте азаматтар күнделікті қолданыстағы ақшасынан да аз болса да пайда көре алады. Мұндай қадам еліміздегі қаржылық сауаттылық пен банк қызметтеріне деген сұранысты арттыруға бағытталған.
