Еліміздің ақпараттық кеңістігінде ерен еңбек етіп, қоғам дамуына үлес қосып жүрген журналистер қауымы жылда маусым айының 28-і күні қуанышқа кенеліп, марапаттарға ие болады. Биыл да сол үрдіс жалғасын тауып, тілшілер қауымы жұртшылық құрметіне бөленуде. Мереке құрметіне облыс прокуроры Ғабит Миразов өңірдегі бұқаралық ақпарат құралдарының жетекші мамандарын жинап, ашық әңгіме-дүкен құрды.
Алдымен арнайы шақырылған тілшілер қауымына сый-сияпат жасап ілтипатын білдірген облыс прокуроры қоғамдағы келеңсіз әдеттердің алдын алудың маңыздылығын, ел өркендеуіне кедергі келтіретін заңсыздықтарды құрықтаудың жайын әңгімелей келе Ақтөбедегі лаңкестік оқиғасына тоқталды. Дәл Рамазан айы кірер тұста бой көрсеткен лаңкестік әрекетті болашақта болдырмау жайы тілге тиек болып, осындай теріс пиғылды ағымдардың зияндылығын халық санасына сіңіруге ақпарат мамандарының қосар үлесі көптеген мысалдармен сараланды. Байланыс және ақпарат қызметкерлерінің күніне орай прокуратура саласында ұзақ жылдар бойы талмай еңбек еткен Әбдіқажым Рысдәулетов бас прокуратураның ІІІ дәрежелі «Мінсіз қызметі үшін» медалімен марапатталды. Медальді марапат иесінің кеудесіне қадаған облыс прокуроры Ғабит Төреұлы Ақсу, Қаратал, Ескелді аудандары мен Текелі қаласында табан аудармай еңбек еткен тәжірибелі қызметкердің өлшеусіз еңбегіне жоғары баға беріп, абыройын асқақтатты.
Бұдан кейінгі әңгіме елдегі саяси ахуал, қазақстандық идеология, қазақ елінің тарихы сынды тақырыптарға ойысып, көпшіліктің көкейінде жүрген өзекті мәселелер сөз болды. Кезектесе сөз алған тілшілер қауымы облыс прокурорына ризашылықтарын білдіріп, маңызды мәселелерді қозғады. Облыстық қоғамдық-саяси «Жетісу» газетінің бас редакторы Әміре Әрін Ұлы Дала тарихына тоқталды.
– Біздің еліміздің тарихы ғасырлар қойнауынан сыр шертеді. Сақ, ғұн дәуірлерін айтпағанның өзінде сонау шумерлер өркениетінің өзегінде бабаларымыздың тағылымды тағдырының, өнегелі өмірінің ізі жатыр. Сол замандардан бастау алған өркениеттің белгілері Ұлы Даладан әлемнің төрт тарапына таралып, бүгінгі күнге бай мұра болып жетті. Біз осындай ұлағатты ұлттың ұрпағы болғанымызбен мақтанамыз, солардың заңды жалғасы екенімізбен шаттанамыз, – деген Әміре Әрінұлы қазіргі қоғам дамуындағы бұқаралық ақпарат құралдарының маңызы жайлы айтып өтті. – Дәл оразаның алдында Ақтөбеде орын алған шетін оқиғадан кейін Елбасы бұқаралық ақпарат құралдарына басымдық беру керектігін ескерткені белгілі. Соның ықпалымен Ақпарат және коммуникация министрлігі құрылып, журналистер қауымына деген ыстық ықылас анық байқалды. Шындығында идеологияның өзегі саналатын бұқаралық ақпарат құралдарын елдің тыныштығы мен тұрақтылығына сына қағатын, бейбітшілік пен ынтымаққа селкеу түсіретін келеңсіз жайттардың алдын алуға тиімді пайдалану керек. Сонда ғана бұқара халық пен билік арасындағы алтын көпір қайта жанданады. Елбасының бастамасымен қолға алынған «100 нақты қадам» Ұлт жоспарының да негізгі өзегі осыған бағытталған. Сондықтан журналистер қауымына сенім білдіріп, мерекелерімен құттықтап отырғаныңызға рахмет, Ғабит Төреұлы! Сіздер мен біздер бірлесіп жұмыс істегенде ғана қоғамның көлеңкелі тұсына жарық түсіп, есесі кеткендердің құқы қорғалады. Ендеше, ортақ мақсатымыздан ажырамайық, көздеген бағытқа бірге жетейік.
Ашық әңгіме кезінде «Хабар» телеарнасының Алматы облысындағы меншікті тілшісі Тілеуқабыл Мыңжасар, «Огни Алатау» газетінің бас редакторы Атсалим Идигов, «Талдықорған» газетінің редакторы Мәулетхан Ақсанов, «Желтая газета» басылымының редакторы Сандуғаш Дүйсенова кезекпен сөз алып, жүрекжарды тілектерін жеткізді. Жиын соңында көпшілік естелік суретке түсті.
Мәди АЛЖАНБАЙ
