Талдықорған қаласының №15 орта мектебінде киберполиция қызметкерлері оқушыларға арналған танымдық цифрлық қауіпсіздік сабағын өткізді, – деп хабарлайды Polisia.kz.
Кездесудің мақсаты – жасөспірімдердің интернет кеңістігінде сауатты әрі жауапты мінез-құлық қалыптастыруына ықпал ету және киберқылмыстардың алдын алу.
Полиция қызметкерлері оқушыларға виртуалды әлемде кездесетін түрлі қауіптер туралы айтты — алаяқтық әрекеттерден бастап жалған ақпараттың таралуына дейін. Сондай-ақ жеке деректерді қорғау ережелеріне, әлеуметтік желілерде қауіпсіз қарым-қатынас орнатуға және контент жариялау кезінде жауапкершілікке ерекше назар аударылды. Оқушылар әңгімеге белсенді қатысып, өз пікірлерін білдіріп, интернет-алаяқтарды қалай тануға болатынын және онлайн-қатерлер кезінде не істеу керектігін сұрады.
Киберполиция өкілдері цифрлық мәдениет – бұл тек технологияны білу ғана емес, оны саналы әрі адал пайдалана білу екенін атап өтті. Мұндай сабақтар жас буынға интернеттің тек қарым-қатынас пен білім алу алаңы ғана емес, заң әрекет ететін орта екенін түсінуге көмектеседі. Демек, желідегі жауапкершілік пен саналық – жеке қауіпсіздік пен қоғамдағы сенімнің кепілі.
