Талдықорғанда мемлекеттік қызметшілер мен жеке тұлғалардың декларациясын тапсыру мәселелері бойынша арнайы жиын өтті. Қаланың Әдеп жөніндегі уәкілі Берік Абылханның төрағалығымен өткен басқосуда Жетісу облысы бойынша мемлекеттік кірістер департаментінің құзыреті және декларация тапсыру қағидаттары түсіндірілді.
Сөз алғандардың айтуынша, бүгінде Қазақстанда жалпыға бірдей декларацияның екі түрі бар. Алғашқысы – 250.00 нұсқасы. Оны азаматтар бір рет қана тапсырады. Одан кейін 270.00 нұсқасын тапсыруы керек. Мұны «Азаматтың мүлкі мен табысы туралы» декларация деп атайды.
– «2024 жылдың 1 қаңтарынан бастап декларациялаудың үшінші кезеңінде активтер мен міндеттемелер туралы декларацияны (250.00 нұсқа) алғаш рет заңды тұлғалардың құрылтайшылары (ЖК, ЖШС, АҚ және т.б.), жеке кәсіпкерлер мен олардың жұбайлары тапсырады. Сонымен қатар бұған дейін декларация тапсырған азаматтар енді жыл сайын 270.00 нұсқа бойынша табысы мен мүлкін көрсетеді. Айта кетері, азаматтардың шетелде мүлкі болмаса да, декларация тапсыруға міндетті, тек құжатта шетелде мүлкі жоқ екенін көрсетеді», –деді кірістер басқармасының өкілі.
Осы орайда жиынға қатысушыларға биылғы жылғы кірістер департаментінің жаңа өзгерістері, декларация тапсырудың ережелері атап айтылып, әрдайым тұрғындарға тегін кеңес беріліп, консультациялық көмек көрсетілетіні жеткізілді.
Айдын КӘЛІМХАН
