Алматы облысының полициясы үйлену кортежіндегі жол талғамайтын көлік жүргізушілерін ұстап, бірыңғай қара тұлпарларды айып тұрағына тоғытты. Бұл жайында Алматы облыстық полиция департаменті мәлімдеді.
Жалпы алғанда, Cadillak Escalade маркалы екі жол талғамайтын көліктердің 29 жастағы С.және Б.есімді жүргізушілеріне, сондай-ақ, бейнежазбадағы Toyota Land Cruser көлігінің 26 жастағы Т.есімді жүргізушісіне 14 әкімшілік хаттама толтырылды. Сонымен қатар, қаруды заңсыз алып жүргені және қолданғаны үшін Toyota Land Cruser жолаушысы — 23 жастағы азамат ҚР Қылмыстық кодексінің 287-бабының 2-бөлігі бойынша қылмыстық жауапкершілікке тартылды.
Естеріңізге сала кетейік, бұған дейін жол қозғалысы ережелерін өрескел бұзғаны үшін үйлену кортежіне қатысушылар әкімшілік жауапкершілікке тартылғаны хабарланған болатын. Бұл автокөлік жүргізушілері Қазақстан Республикасының Әкімшілік құқықбұзушылықтар туралы кодексінің бірнеше баптары бойынша жауапкершілікке тартылды:
— 590 бабы 2-тармағы бойынша – мемлекеттiк тiркеу нөмiрi белгiлерi (белгiсi) жоқ көлiк құралын басқару — 10 АЕК мөлшерінде айыппұл;
— 590 бабы 7-бойынша – тиiстi рұқсатсыз қайта жабдықталған көлiк құралын басқару — айыппұл 15 АЕК;
— 606 бабының 1-тармағы бойынша – жол жүрiсiне қатысушының авариялық жағдай туғызуға әкеп соққаны –– айыппұл 10 АЕК;
— 612 бабының 1-тармағы бойынша – өзімен бірге жүргiзушi куәлiгi жоқ жүргiзушiнiң көлiк құралын басқаруы – 5 АЕК айыппұл;
— 595-бабы 1-бөлігі бойынша – Жол жүрісі қағидаларының жүру, қайта ауыстыру, бұрылу, кері бұрылу немесе тоқтау алдындағы сигнал беру талабын орындамау – 5 АЕК мөлшерінде айыппұл;
— 596 бабы 1-бөлігі бойынша –жаяу жүргiншiлер жолдарымен, жол жиектерiмен немесе тротуарлармен жүру – айыппұл 15 АЕК;
— 596-баптың 2-бөлігі бойынша – көлiк құралын жолдың жүру бөлiгiнде орналастыру, қарсы жүрiп өту немесе басып озу қағидаларын бұзу – 15 АЕК айыппұл;
— 230 бабының 2-тармағы бойынша – міндетті сақтандыру шартын жасаспай көлік құралын басқару – айыппұл 10 АЕК;
— 603-баптың 2-бөлігі бойынша — арнайы жарық және дыбыс сигналдарын беруге арналған құрылғыларды көлiк құралына тиiстi рұқсатсыз орнату — 25 АЕК айыппұл.
Қару-жарақ, сондай-ақ автокөліктерге заңсыз орнатылған жарық және сигналдық-дыбыстық құрылғылар тәркіленіп, көлік құралдары арнайы айып тұрағына қойылды. Іс жүргізу материалдары шешім қабылдау үшін сотқа жіберілді.
«ЖЕТІСУ-АҚПАРАТ»
