Жетісу облысында Панфилов ауданының 29 жастағы тұрғыны тағы да мас күйінде көлік жүргізіп, қылмыстық жауапкершілікке тартылды. Бұл туралы облыстық полиция департаменті хабарлады.
2025 жылдың қазан айында Батыс Қытай–Батыс Еуропа халықаралық автомагистралінің шығыс бағытында КамАЗ жүк көлігін басқарған ер адам алдындағы VOLVO FH көлігімен соқтығысып, жол-көлік оқиғасын тудырған. Абырой болғанда, адам шығыны болған жоқ, алайда екі көлік те айтарлықтай зақымданған.
Оқиға орнына дереу жеткен полиция қызметкерлері көлікті арнайы тұраққа қойып, жүргізушіні ұстады. Тексеру кезінде оның мас күйінде болғаны және бұрыннан көлік жүргізу құқығынан айырылғаны анықталды.
Тергеу барысында күдікті өз кінәсін мойындап, 15 қазан күні сағат 22:00 шамасында Ынтымақ ауылындағы үйінде алты бөтелке сыра ішкенін және жүргізуші куәлігінен айырылғанына қарамастан, Қытай Халық Республикасына қарай жолға шыққанын айтқан.
Белгілі болғандай, бұл азамат заңды елемеуді бұрыннан әдетке айналдырған. 2021 жылы ол мас күйінде көлік жүргізгені үшін жеті жыл мерзімге жүргізуші куәлігінен айырылған. 2022 жылы қайта ұсталып, сот шешімімен 2 жыл 6 ай мерзімге бостандығы шектеліп, 100 сағат мәжбүрлі еңбекке тартылған. Алайда ол бұл жазалардан сабақ алмаған.
Қазіргі таңда күдіктіге қатысты ҚР Қылмыстық кодексінің 346-бабы бойынша (Жүргізу құқығынан айырылған адамның мас күйінде көлік басқаруы) қылмыстық іс қозғалды. Аталған бапқа сәйкес, бас бостандығынан айыру жазасы қарастырылған.
