Шымкент қаласында орын алған 21 жастағы бойжеткеннің өлімі ел ішінде үлкен резонанс тудырды. Студент Нұрай Серікбайдың өмірін қиған бұл қылмыс – жұмыс істемеген жүйенің, еленбеген арыздың және жазасыздыққа сенген озбырлықтың ащы жемісі, – деп хабарлайды 7-su.kz ақпараттық порталы.
Марқұмның ағасы Сұлтан Серікбайдың айтуынша, күдікті Аймахан Шерхан Нұрайдың соңынан бір елі қалмай, психологиялық қысым көрсетіп келген. Жас қыздың «жоқ» деген жауабын түсінбеген ол «сталкерге» айналған. Бойжеткеннің абыройы мен жеке кеңістігіне қол сұғып, оның әрбір қадамын аңдып, қорқытып-үркітуді тоқтатпаған.
Тіпті, күдіктінің Нұрайды бұған дейін Алматыдан күштеп алып қашқаны белгілі болды. Алайда, туыстары оны арашалап алғанымен, қаскөйдің құрығынан құтқара алмады. Ол қыздың сабақ кестесін анықтап, оқу орнына дейін келіп, сес көрсетуін жалғастырған.
Желіде тараған мәліметтерге сүйенсек, күдікті өз әрекеттері үшін заң алдында жауап бермейтініне бек сенімді болған. Оның марқұмға: «Мені бәрібір темір торға қамай алмайсың» деп ашықтан-ашық айтуы – құқық қорғау жүйесіне тасталған үлкен сын. Нұрайдың полицияға жазған арыздары тиісті деңгейде қаралмағандықтан, қылмыскер өзін батыл сезінген.
Қазіргі таңда әлеуметтік желілерде #НұрайҮшін хэштегімен наразылық акциясы жүріп жатыр. Қазақстандықтар бұл істің тек «Кісі өлтіру» бабымен шектелмей, кешенді түрде тергелуін талап етуде.
Нұрайдың бала кезден бергі құрбылары оны «мектепті үздік бітірген, ұяң, тәрбиелі қыз» ретінде сипаттайды. Кейбір желі қолданушыларының «өзі себепші болған шығар» деген пікірлері жақындарының жарасына тұз сепкендей болды. Олар Нұрайдың өз шекарасын қорғап, еркін өмір сүргісі келгені үшін жазықсыз жапа шеккенін айтып, оның абыройына тіл тигізбеуді сұрайды.
11 қаңтар күні кешке орын алған бұл қатыгездік – сегіз жерден пышақ сұғумен аяқталды. Шымкенттік студенттің туысқандары әділдік сұрайды. Егер бұл жолы да «бармақ басты, көз қысты» әрекеттер орын алса, ертең кез келген қыздың тағдыры осылай аяқталмасына кім кепіл?
