Алаяқтар дипфейк технологиясын кибершабуыл жасау және конфиденциалды деректерді ұрлау құралы ретінде белсенді қолдана бастады. Дипфейк – жасанды интеллект көмегімен өңделген фото, бейне немесе аудиожазба, – деп хабарлайды 7-SU.KZ ақпараттық порталы.
Бұл технология кез келген адамның бет-әлпетін, дауысын, мимикасын дәл көшіруге, тіпті ол ешқашан айтпаған сөздерді «сөйлетуге» мүмкіндік береді. Қазіргі таңда кейбір сервистер бір ғана фотосурет немесе бірнеше секундтық дауыс жазбасы арқылы дипфейк бейне немесе аудио жасап шығара алады.
Дипфейктің көмегімен қаскүнемдер:
-
бөтен адамның бейнесін қолдан жасап, банктік шоттарға қол жеткізе алады;
-
қаржыны қолма-қол ақшаға айналдырып, жалған кредиттер ресімдейді;
-
қайтыс болған адамдардың деректерін пайдаланып, онлайн-банкинг жүйелеріне заңсыз кіруі мүмкін.
Дипфейкті қалай ажыратуға болады?
Мамандар келесі белгілерге назар аударуға кеңес береді:
-
көздің әдеттен тыс жыпылықтауы;
-
бейненің үзілуі немесе бет-әлпеттің «жоғалып кетуі»;
-
қисынсыз сөздер, кекештену;
-
роботқа ұқсас сөйлеу мәнері.
Егер жақын адамыңыз немесе танысыңыз қоңырау шалып, шұғыл түрде ақша аударуды сұраса, әңгімені бірден тоқтатып, оған өзіңіз қайта қоңырау шалыңыз. Бұл шынымен сол адамның хабарласқанына көз жеткізуге көмектеседі.
Киберқылмыспен күрес жолдары
Дипфейкті қолданатын алаяқтармен күрестің басты тәсілі – азаматтардың ақпараттық сауаттылығын арттыру және цифрлық гигиенаны сақтау. Сонымен қатар, арнайы онлайн-сервистер арқылы фото және бейнематериалдардың түпнұсқалығын тексеру ұсынылады.
Ескерту: жылдам әрі кепілді табысқа уәде беретін жарнамаларға сенбеңіз. Мұндай ұсыныстарды тек алаяқтар береді. Олар жалған инвестициялық платформаларға шақырып, беделді тұлғалардың суреттерін пайдаланады және деректеріңізді қалдыруды немесе аз мөлшерде ақша аударуды талап етеді.
Қазақстан Республикасының Қаржы нарығын реттеу және дамыту агенттігі қаржы ұйымдарының ақпараттық қауіпсіздігін қамтамасыз ету бойынша тұрақты түрде шаралар қабылдап келеді. Қазіргі таңда клиенттерге қашықтан қызмет көрсету барысында биометрияны міндетті түрде қолдана отырып, екі факторлы аутентификация талап етіледі.
