Алматы қаласында белгілі қоғам белсендісі Санжар Боқаев құқық қорғау органдары тарапынан ұсталды. Бас прокуратура аталған жағдайға байланысты ресми мәлімдеме жасап, істің мән-жайын түсіндірді. Ведомство таратқан ақпаратқа сүйенсек, ұстау шаралары қолданыстағы заңнама аясында жүргізілген, – деп хабарлайды 7-su.kz ақпараттық порталы.
Құзырлы органның ресми хабарламасында былай делінген:
«Бүгін Алматы қаласының аумағында қылмыстық іс бойынша тергеу әрекеттерін жүргізу шеңберінде ҚР ҚІЖК-нің 128-131-баптарының тәртібімен Санжар Боқаев ұсталды. Тергеу мәліметтері бойынша, Боқаев жалған ақпарат тарату және жағымсыз қоғамдық пікір қалыптастыру мақсатында әлеуметтік желілерде жекелеген тұлғалардың қоғамдық саябақ аймағында ағаштарды заңсыз кесуі және құрылыс нысандарынан мүлік ұрлауы туралы бейнематериалдар орналастырған деп күдікті ретінде танылды».
Сондай-ақ, тергеу деректері бойынша, Боқаев табысы төмен адамдарды тарту арқылы қылмыстарды ұйымдастырып, оларға сыйақы үшін ағаш кесуді және ұрлық жасауды тапсырған деген уәж келтірілген. Бұдан бөлек, ол алаяқтық жолымен аса ірі көлемде қаржы жымқырды деген күдікке ілініп отыр.
Қазіргі уақытта ҚР ҚІЖК-нің 201-бабына сәйкес, тергеудің өзге мәліметтері жария етуге жатпайды. Құқық қорғау органдары істің жан-жақты қаралатынын мәлімдеді.
