Жетісу облысы бойынша Сауда және тұтынушылардың құқықтарын қорғау департаменті сот арқылы өңір тұрғындарына ірі байланыс операторынан ақшаны қайтаруға қол жеткізді, – деп хабарлайды 7-su.kz ақпараттық порталы.
Талдықорған қалалық сотының 2026 жылғы 13 қаңтардағы ұйғарымына сәйкес, сот ісі облыс аудандарының біріндегі тұрғындардың ұжымдық арызы негізінде басталған. Анықталғандай, абоненттер ұзақ уақыт бойы «отбасылық тариф» бойынша мобильді байланыс пен интернет қызметіне ақы төлеп келген. Тіпті, оператормен жасалған келісімшарт аясында смартфондар да сатып алған. Тұрғындардың ай сайынғы төлемі 11 670 теңге және одан да жоғары болған.
Мәселенің мәні: 41 күнге созылған қолайсыздық
2025 жылдың 10 қазан мен 19 қараша аралығында, яғни тура 41-күн бойы байланыс пен интернет қызметі тиісті деңгейде көрсетілмеген. Байланыс үзіліп, интернет мүлдем жұмыс істемесе де, оператор абоненттік төлемді толық көлемде ұстап отырған.
Бұл жағдайдың әлеуметтік салдары да ауыр болды:
-
Тұрғындар мемлекеттік органдар мен шұғыл қызметтерге хабарласа алмай қиналған;
-
Мектеп оқушылары қашықтан оқу мен үй тапсырмаларын орындау мүмкіндігінен айырылған.
Заң не дейді?
«Тұтынушылардың құқықтарын қорғау туралы» ҚР Заңының 7-бабына сәйкес, әрбір азамат сапалы қызмет алуға құқылы. Егер қызмет көрсетілмесе, төленген қаражатты қайтаруды немесе қайта есептеуді талап етуге әбден болады. Оператор сотта бұл аймақта тиісті телекоммуникациялық инфрақұрылымның жоқтығын алға тартқанымен, тұтынушыларға алдын ала ескерту жасалғанын дәлелдей алмады.
Нәтиже: Тұрғындар жеңіске жетті
Департамент сотқа 315 538 теңге көлемінде талап арыз жолдады. Сот барысында оператор өз қателігін мойындап, тараптар медиациялық келісімге келді. Нәтижесінде өңір тұрғындарына 234 657 теңге қайтарылды.
Бұл оқиға – барлық байланыс операторлары үшін маңызды сабақ. Қызмет сапасы төлемнің көлеміне сай болуы тиіс. Жетісу облысында тұтынушылардың құқығын қорғау жұмыстары алдағы уақытта да жалғаса бермек.
