Қазақстан Республикасының Мемлекеттік қызмет істері және сыбайлас жемқорлыққа қарсы іс-қимыл агенттігінің Алматы облысы бойынша департаментінің мамандары бейнебайланыс арқылы ауылдық округ әкімдерінің қатысуымен мемлекеттік сатып алу мониторингісі туралы семинар-кеңес өткізді.
Алғашқы болып Мемлекеттік қызмет істері және сыбайлас жемқорлыққа қарсы іс-қимыл агенттігінің Алматы облысы бойынша департаменті басшысының орынбасары Данияр Сабырбаев баяндама жасап, мемлекеттік сатып алу мониторингін жүргізудің шарттарын түсіндіріп өтті. Оның айтуынша, мемлекеттік сатып алу мониторингін жүргізуге үкіметтік емес ұйымдарды көптеп қатыстыру заман талабынан туындап отыр.
– Сыбайлас жемқорлыққа қарсы іс-қимыл бүгінгі күні ең маңызды мәселеге айналды. Әсіресе мемлекеттік сатып алу саласындағы сыбайлас жемқорлықтың алдын алу кезек күттірмейтін іс. Тіркелген сыбайлас жемқорлық қылмыстарының 12%-ы осы салаға тиесілі, – деген Данияр Бауыржанұлы түйткіл мәселенің түйінін тарқатқандай болды. – Қызметін асыра пайдаланып, сыбайлас жемқорлыққа дем беру деректері әсіресе мемлекеттік сатылымдарды бір көзден сатып алу кезінде өткізу бойынша байқалуда. Бұл Заң 56 негіз бойынша ешқандай конкурссыз сатылымдар өткізуге мүмкіндік береді. Бұл 2002 жылдағы заңнамамен салыстырғанда 5 есеге жоғары. Мысалы, былтыр құны 866 миллиард теңге болатын мемлекеттік сатып алудың 40%-ы конкурссыз өткізілген. Соңғы 2 жылдың ішінде Мемлекеттік қызмет істері және сыбайлас жемқорлыққа қарсы іс-қимыл агенттігі жалпы құны 7,3 миллиард теңге болатын қызмет құнының артуын тоқтатқан. Биылғы жыл басынан мемлекеттік сатып алуға мемлекеттік бюджеттен бөлінген қаржының құны 2 триллион 700 миллиард теңгеден асып кеткен. Жүргізілген тексерулердің нәтижесі бойынша агенттіктің облыстық департаментінің мамандары бюджет қаржысынан 31 544 400 теңгенің тиімсіз жұмсалғанын анықтап, заңбұзушылықты болдырмаған. Осыған орай барлық аудандық, қалалық, ауылдық округ әкімдіктерінің осы бағытқа жауапты мамандарының өз істеріне мұқият болуы қажет.
Бұдан кейінгі кезекте облыстық мемлекеттік сатып алу басқармасының бас маманы Нұрсұлтан Орынбасаров, облыстық ішкі мемлекеттік аудит департаментінің бөлім бастығы Қалмағамбет Рахметов есеп беріп, өздерінің жұмыстарын таныстырды. Есік қаласының әкімі Бауыржан Бименов пен Іле ауданы, Боралдай ауылдық округі әкімінің орынбасары Аманбол Әлімханов бейнебайланыс арқылы өздерінде атқарылған жұмыстардың нәтижесін паш етті.
М. Әсетұлы.
