Жетісу облысының «Қорғас» шекаралық бақылау басқармасында мемлекеттік қызметкерлер үшін маңызды жиын өтті. ҚР ҰҚК Шекара қызметінің жеке құрамына салық декларациясын тапсырудың тәртібі мен мерзімдері туралы егжей-тегжейлі ақпарат берілді, – деп хабарлайды 7-su.kz ақпараттық порталы.
Кездесуге салық комитетінің білікті мамандары Ж. Сағымбекова мен Н. Кали қатысып, жалпыға бірдей декларациялаудың маңызын атап өтті. Мемлекеттік қызметкерлер мен олардың жұбайлары үшін бұл процесс ашықтықты қамтамасыз ететін маңызды қадам.
Мамандар декларацияны толтырудың заманауи тәсілдеріне тоқталды. Декларацияны «Салық төлеушінің кабинеті» арқылы электронды түрде тапсыруға болады. «E-salyq Azamat» мобильді қосымшасы арқылы үйде отырып-ақ есеп беру мүмкіндігі бар. Сонымен қатар мерзімдерді сақтау және мәліметтердің нақтылығын тексеру қажеттілігі түсіндірілді.
Жиын барысында шекарашылар өздерін мазалаған сұрақтарға жауап алды. Әсіресе, мүлік пен кірістерді көрсету кезінде жиі жіберілетін қателіктер мен олардың алдын алу жолдары талқыланды. Бұл шара мемлекеттік қызметкерлердің құқықтық және цифрлық сауаттылығын арттыруға бағытталған.
Декларацияны уақтылы тапсыру тек заң алдындағы міндет қана емес, сонымен қатар жемқорлыққа қарсы іс-қимылдың тиімді тетігі. «Қорғас» бақылау басқармасының өкілдері мұндай түсіндіру жұмыстарының маңызды екенін және заң талаптарын қатаң сақтайтынын атап өтті.
