Алакөл ауданының Жанама ауылында орналасқан №54 сайлау учаскесінде облыстық Мерейлі отбасы – 2025 байқауының жүлдегерлері – Шугаевтар әулеті ерекше ұйымшылдықпен келіп, өз таңдауларын жасады, – деп хабарлайды 7-su.kz ақпараттық порталы
Бір шаңырақтан тараған үлкен әулеттің 70 мүшесі сайлау учаскесіне бірге келіп, бірлік пен азаматтық белсенділіктің жарқын үлгісін көрсетті.
Әулеттің үлкендері мен жастары қатар қатысып, ел болашағына қатысты маңызды сәтке бейжай қарамайтынын байқатты.
Ең әсерлісі – олар бұл маңызды күнге кішкентай немере мен шөберелерін де ерте келген. Бұл – жас ұрпаққа елдік құндылықтарды, азаматтық жауапкершілікті үлгі етіп көрсетудің айқын белгісі.
«Мерейлі отбасы» атанған Шугаевтар әулеті тек отбасы ішіндегі татулығымен ғана емес, қоғам өміріне белсенді араласуымен де танылып келеді. Бірнеше буын өкілдерінің бір мезетте келіп таңдау жасауы – ұрпақ сабақтастығы мен елге деген құрметтің көрінісі.
Осылайша, Жанама ауылында әулеттің үлкені мен кішісі қатар келіп, ел болашағына қатысты маңызды шешімде өз үлестерін қосты.
