Бас көлік прокуратурасы елімізде суық қарудың, соның ішінде кастеттер мен пышақтардың заңсыз айналымына байланысты қылмыстардың алдын алу мақсатында кешенді шаралар жүргізуде, – деп хабарлайды 7-su.kz ақпараттық порталы.
Құзырлы орган өкілдері Қылмыстық кодекстің 287-бабы аясында тыйым салынған заттарды тасымалдау мен сақтау деректерін қатаң бақылауға алды.
Тергеу амалдары анықтағандай, заң бұзушылар көбіне қауіпті құралдарды интернет-дүкендер арқылы иемденген. Мәдениет және ақпарат министрлігінің Ақпарат комитетімен бірлескен тексеріс нәтижесінде «Satu.kz» маркетплейсінің суық қару жарнамасын заңсыз орналастырғаны белгілі болды. Аталған сауда алаңы Әкімшілік құқық бұзушылық туралы кодекстің 455-бабы бойынша жауаптылыққа тартылып, тыйым салынған контентті бұғаттау жұмыстары басталды. Мұндай қатаң шаралар цифрлық кеңістіктегі қауіпсіздікті қамтамасыз етуге бағытталған.
Қазіргі таңда әуежайлар мен теміржол вокзалдары сияқты көлік нысандарында ақпараттық жұмыстар күшейтілді. Жолаушылар көп жиналатын орындарда қылмыстық жауаптылық туралы ескертетін плакаттар мен баннерлер орнатылған. Сонымен қатар азаматтар үшін тыйым салынған заттарды өз еркімен тапсыруға арналған арнайы жәшіктер қойылды. Мамандардың айтуынша, заңсыз қаруды өз еркімен өткізген адамдар қылмыстық қудалаудан босатылады.
Бас көлік прокуратурасы азаматтарды сақ болуға шақырады. Суық қаруды заңсыз иемдену, өткізу, сақтау немесе алып жүру ауыр зардаптарға соқтыруы мүмкін. Сапарға шығар алдында қол жүгі мен жеке заттарды мұқият тексеріп, кездейсоқ заң бұзушылықтың алдын алған абзал. Тәртіп сақшылары заңсыз жарнама мен тасымалдау деректерін анықтау бойынша рейдтік шараларды жалғастыра бермек.
