Талдықорған қаласында Жетісу облысы Полиция департаментінің есірткі қылмысына қарсы іс-қимыл басқармасының қызметкерлері есірткі құралдарының заңсыз айналымын тоқтатуға бағытталған жедел-іздестіру шараларын жүргізді, – деп хабарлайды 7-su.kz ақпараттық порталы.
Операция барысында Еркін ауылында есірткіні заңсыз сақтау және сату күдігімен Талдықорған қаласының 62 жастағы тұрғыны ұсталды. Тергеу әрекеттері шеңберінде полицейлер бақылау сатып алу шарасын ұйымдастырып, күдіктіден жалпы салмағы 5 грамнан асатын гашиш затын алған. Аталған әрекеттен кейін жүргізілген тінту жұмыстары кезінде оның тұрғылықты мекенжайынан жасыл түсті, өзіне тән иісі бар өсімдік тектес зат салынған алты полиэтилен пакет тәркіленді.
Сонымен қатар үй ауласындағы сарайдан скотчпен оралған үлкен қара пакет табылды. Оның ішінде жалпы салмағы 5 келіден асатын, алдын ала болжам бойынша гашиш есірткі заты екені анықталды. Қазіргі уақытта аталған дерек бойынша сотқа дейінгі тергеп-тексеру амалдары жүргізіліп, оқиғаның барлық мән-жайлары пысықталуда.
Күдіктіге қатысты сот шешімімен, денсаулық жағдайы ескеріліп, үйқамақ түріндегі бұлтартпау шарасы таңдалды. Жетісу облысы Полиция департаменті өкілдері есірткінің заңсыз айналымына қарсы күрес полиция жұмысының басым бағыты екенін және кез келген заңсыз дерек қатаң түрде тоқтатылатынын атап өтті.
Қазақстан Республикасының қолданыстағы заңнамасына сәйкес, есірткі құралдарын өткізу мақсатында заңсыз сақтау немесе сату қылмысы үшін мүлкі тәркіленіп, 7 жылдан 12 жылға дейін бас бостандығынан айыру жазасы қарастырылған.
Посмотреть эту публикацию в Instagram
