Талдықорған қаласында полиция қызметкерлері өз өмірін қатерге тігіп, өртеніп жатқан үйден ер адамды аман алып шықты, деп хабарлайды 7-su.kz ақпарттық порталы.
Polisia.kz сайты хабарлағандай, оқиға кешкі уақытта «Жастар-3» ықшамауданында болған. Көршілердің айғай-шуына байланысты түскен хабар бойынша қоғамдық қауіпсіздік бөлімінің инспекторлары Темірлан Қажыханұлы мен Мақсат Сейтберлі дереу оқиға орнына жеткен.
Келген сәтте полицейлер үйлердің бірінің шатыры отқа оранғанын байқаған. Көршілердің айтуынша, үй ішінде адам болған. Осыны естіген полиция қызметкері Темірлан Қажыханұлы жалын мен қою түтінге қарамастан, үйдің шатырына көтеріліп, есінен танып жатқан ер адамды тауып алған.
Ол зардап шегушіні қолына көтеріп, от жалмаған шатырдан секіріп түскен. Жедел жәрдем мен өрт сөндірушілер келгенше ер адамның жағдайын бақылауда ұстаған.
Оқиға барысында Темірлан Қажыханұлы түтіннен жеңіл уланғанымен, ауруханаға жатудан бас тартып, қызметін жалғастырған. Ал құтқарылған азамат қазіргі таңда дәрігерлердің бақылауында.
Өрттің шығу себебі анықталып жатыр.
Бұл оқиға – полиция қызметкерлерінің батылдығы мен адал борышына деген берік ұстанымының айғағы.
